新年手作

人在外地，真係會非常懷念家鄉小食的。特別係我呢的咁鍾意食的人。

懶惰如我，來了差不多兩年都未做過任何家鄉小食，也不能幸免，要做一些新年手作，給自己來點安慰。
年糕同蘿蔔糕呢的咁普通的新年食物，網上隨便找找也可以找到很多不同的食譜及做法。但，同好多人一樣，我都係覺得自家製的那一款最好，因為是食從小到大食慣了的味道麻，所以份外覺得自家媽媽牌的那個食譜才是最信得過！
下面這個只有我自己先看得明的食譜，如果是高手的話，便不用看了。如果不是高手的話，更加不用看了（因看了也不會明），所以，這食譜只是給我明年再看看，睇下我還整得出什麼來吃。
材料：(1)蘿蔔，切絲備用(2)粘米粉(3)蝦米，浸水備用(4)冬菇，浸水切絲備用(5)臘腸，隨意切片或粒備用(6)冰糖(7)油、鹽、胡椒粉
比例：六斤蘿蔔：一包粘米粉(1lb)，三斤＝4lb
方法：
1)先炒炒冬菇，臘腸，蝦米，放在一旁。
2)放蘿蔔絲落鑊炒，加少少油、鹽、胡椒粉，加一粒燒賣咁上下大的冰糖。
3)加(1)的料炒埋一堆
4)熄火，逐少落粘米粉入去蘿蔔絲堆，炒均一團。基本上炒蘿蔔絲時，蘿蔔絲係會出水的，所以陳媽子話無須另外加水。
不過好似係我呢度咁乾燥嘅地方，的蘿蔔絲都無乜水出，我就將浸冬菇同蝦米的水逐少加入去，不過出嚟盆糕就會深色的。想盆糕靚仔的就加水好了。
5)將蘿蔔絲團過落糕盆，蒸一個鐘便可以了。

不得不提，上面是今年買的三大條蘿蔔，又乾又瘦（係女仔就好囉！）直徑只得吋半，共重4.78lb，總值US$12。係呀！係港幣96大洋呀。。。連肥鬼都問我係唔係堅買呀。。。

三條瘦蘿蔔，只夠我整一個九吋盆及兩個小方便飯盒，真係都唔夠一次下午茶。
所以，我決定係唔會同的“唔識欣賞”嘅人分享架喇！不過，我會比一小盒阿肥鬼拎返工，佢有個同事係上海人，我希望佢識貨喇！不過唔知上海人新年食乜嘅呢？識唔識我地呢的香港蘿蔔糕架？

講到自己好懶咁樣！其實我上年都整過一的新年手作，係呀！無睇錯呀！係2009年呀！依家先一次過寫囉！哈哈！大家應該很意外吧！特別係陳媽子啦！我竟然實驗了角仔同埋年糕。。。都OK似模似樣架！
首先，自己唔知係邊到搵到整油皮個比例，咁就胆粗粗試下啦。
基本上，我都係一個實戰派主婦，即係搵個食譜係度，都只係for reference唔會死跟，見到舊粉團好乾，咪加的油囉，“猜”到舊粉咁上下texture就ok架喇！

碌開舊粉，但係搵唔到大口杯，只係整到mini-角仔。

“盅”碎咗的杏仁，係呀！我唔鍾意花生麻，所以落重本，“盅”碎的原粒杏仁，350F焗15-20分鍾，之後加椰絲及少少的糖（因為的椰絲己經係甜的！）

最後，包埋一舊。陳媽子，我的手勢都合格喇？

不過我唔想浪費一大鑊油，所以我的角仔係焗熟嘅！都OK架，仲無咁肥添。。。
製成品無影相，因為死肥鬼又係度催到行出門口（個日係上年的super bowl，我地去肥鬼舅父屋企party）。
成積係點？一如其他又甜又脆的東西，的西人都會當曲奇咁樣食鬼晒！！哈哈！
反而，下面的年糕，就唔係咁受歡迎。有人食，不過都只係試食性質。出奇地，後來我們返咗屋企，我蒸番熱的年糕，肥鬼又食喎！！！一底年糕一星期就清咗喇！

陳媽子，我唔記得上年寫低個年糕點整個張紙飛咗去邊呀！！！
我諗都係打比你快的！哈哈！