係六月嘅第一次小小實驗，就係當我係韓國超市搵到豆腐嘅時候，即刻攞嚟煲我的姬松茸。以前係屋企，阿媽係會攞嚟煲節瓜嘅，非常入味，係呢到我搵唔到節瓜，豆腐都攞嚟頂住先，但都好鬼好味！！
就係入咗秋天之後，我先開始真真正正煲多咗老火湯。
係九月中整嘅中國人超市湯包煲瘦肉係第一次嘗試。連個湯包係乜名都唔知嘅我，乜都無諗，總之就係比的瘦肉落去，驚唔夠料，再擺多舊粟米落去，狂煲佢兩個半鐘！之但係煲嚟煲去都係無乜味咁囉，所以之後都無煲過呢的湯包！
舊豬肉都唔算細舊呀！
呢的好似係叫槐山？！？！
好似乜豆都有的咁囉！不過就係少的囉，我都唔敢比咁多水落去，所以，煲埋得兩大碗湯咁多。。。
第二次，就係九月尾整上次講過嘅西人菜湯啦，今次唔使再介紹喇！
跟住呢，第三次，就係睇到 blog 友師父嘅介紹，又見的材料好易買齊，所以就係十月中試吓三蕃湯（蕃茄，薯仔，南瓜），好成功呀！連肥鬼都飲。。。
隔咗幾日，身痕又走去試吓煲木瓜粟米湯，今次仲比咗的杏仁落去，不過都係煲嚟煲去都整唔到阿媽煲咁嘅味道。。。
十月尾，見的三蕃湯咁易煲，今次又試整色整水，攪吓新野。因為肥鬼表姐夫Harold比啌的三文魚我地，再加上同合唱團大笑始婆講電話時佢提我。。。就試吓三蕃三文魚湯喇。。。真係好鮮味架。。。
好味到我第二日再將的南瓜打碎變茸。。。就變成三蕃三文魚濃湯。。。好正呀！
後記：因為肥鬼係唔好海鮮嘅，以上所介紹嘅海鮮濃湯，都係我一人獨享。。。仲有肥鬼表姐夫Harold比我地的三文魚都係。。。所以個晚，我就煎咗舊三文魚
無理由齋食架，就用磨菇（切碎）同少少煙肉碎起鑊，比的檸檬汁及芥末醬加少少糖同奶，就整咗呢個汁出嚟，超級開胃野味！！不過下次可以再整靚仔的！！！
No comments:
Post a Comment