靚仔訪客

每朝早，好準時八點幾，隔離屋就會放隻狗仔出嚟去方便，但佢地有個超級壞習慣 － 就係次次都要等到隻狗仔『吠』到就快『啞』咁樣，先會施施然開門比隻狗仔返入屋好似肥鬼呢的返夜嘅人，就朝朝比佢地嘈醒。

尋日一早，當然又聽到隔離屋隻狗係到狂吠。不過，好彩我地尋日都要早起（肥鬼去on the job training 返朝九晚五）唔係真係多得佢唔少。。。

咁係肥鬼走咗一陣之後，我發覺門口有個來賓。嘻！係呢位來賓嚟到嘅時候，連肥仔都兩眼發光咁叮實佢架！

就係佢囉！隔離屋隻貓！唔知佢叫乜名架，不過之前見過佢兩次咁多。
第一次係撞啱嘅渣，開頭就係隔離屋個仔係花園玩，之後隔離屋太太都出咗嚟傾兩句（第一次打招呼）嘅時候，呢隻貓仔就乘機又走埋出嚟散步囉！

第二次呢！另我對隔離屋養動物嘅方法大開眼界！個日，我係後園種花嘅時候，見到呢隻貓仔又係個後園行嚟行去，成個下午都無人走出嚟理佢，我以為佢地又走失貓仔，所以就拍佢地後門，話佢地知啦，點知隔離屋太太開門出嚟之後話“係呀！我見佢成日都想走出去，又成日偷走出去，所以就放佢走出去囉！”再加一個覺得我多事嘅表情！所以自始之後我地都無傾過囉。。。應該係咁啱無機會撞見架唶。。。哈哈

不過，呢隻貓仔真係好鬼得意架，但佢好高竇囉，零食同繩都引佢唔到架，乜野先得呢 － 就係pet（撫摸佢個頭）佢囉，我摸吓佢，行過的，摸吓佢，行過的，咁樣引咗佢過嚟我個到玩囉。

自己瞓係到晒太陽。。。

陽光太猛喇！

好似隻豹貓。。。好型

係到玩碌地沙，佢唔知的樓梯係通窿嘅，所以碌咗兩級之後，就跌咗落去草地個到又行番上嚟。。。哈哈

跟住我又同佢玩繩，佢真係好快手架，仲吓吓好似閃電咁快咁樣咬住條繩。。。哈！

不過佢真係好高竇咁，玩咗一陣又自己走咗去囉。。。