第一個地道Halloween

人生第一次，最地道嘅Halloween就係由呢道開始喇！呢道就係Uncle John & Aunt Pam嘅屋企囉。點解要嚟呢道？

一）因為佢地屋企，道具齊全。你睇下！我嚟到嘅時候，佢地就係咁樣將的道具拎晒出嚟比我挑選。。。哈哈

二）因為呢區嘅細路數目好驚人，驚人到下面呢堆糖，會係一個鐘頭之內派晒！所以，肥鬼阿媽特登車我嚟呢道，比我感受一下地道Halloween嘅氣氛。。。

跟住要講吓我家姐最想知嘅造型問題！第一位，必定要介紹嘅 － 肥鬼媽咪。
大家請看下圖，呢個就係佢當日嘅造型 － 太空人裝！

遠睇唔係好清楚睇睇近鏡，係咪好真咁呢？係呀！係真架！珍珍都無咁真！！USA NASA太空總處制服一套。哈哈！

話說，肥鬼阿媽係一名科學教師，係25年前，佢比學校提名咗去參加 Nasa Space Camp (Science Teachers' Program)， 就係學校出錢比機票呀津貼呀咁樣，然後佢地接受完太空人訓練返嚟，就去好多學校到做興趣班／講座／實驗等等，提高學生對科學／外太空知識嘅興趣。
我聽肥鬼阿媽講番，佢去受訓個年，最後真係有挑選到一位教師一同上外太空，不過，唔知係好彩定唔好彩，個隻太空穿梭機最後係意外爆炸咗，無一生環。
但自始之後，肥鬼阿媽好努力keep fit，每一年都以太空人打扮出現係Halloween，證明佢依家仲好fit，仲著得落25年前嘅制服。而且成日有人同佢講“哇！你個打扮好真呀！”跟住佢就笑住答“係呀！係真架！”呢個答案通常都嚇親的人。。。
第二個要介紹嘅，梗係Uncle John, Aunt Pam & Chelsea啦。。。
下圖左起：Chelsea, Uncle John, 我, Aunt Pam

其實我都唔知我個係乜東東打扮，咁就叫自己做中東女喇，哈哈！呢套服裝，梗係由Aunt Pam提供啦！佢好犀利架，所有道具，都係每年過咗Halloween做特價個陣買落下年用，所以，我套中東女衫，係新架。。。上年買，US$3蚊渣。。。哈哈
女子組合照

跟住落嚟，要睇睇，Aunt Pam每年都好比心機去佈置間屋，嚇到好多細路架。。。呢個係門口，影個陣仲係日光日白，唔係好覺，一入夜黑咗之後，再加上佢地會放迷煙，真係好驚吓。。。

會變色科學怪人。。。

攪鬼路牌。。。

連棵樹都掛滿道具。。。

開始入夜嘅時候影嘅，Pam就企定係個門口度，的細路就要經過條陰深小路行入去門口到trick or treat。。。

Uncle John就坐係小路巷尾嘅後面，嚇的細路同放迷煙。。。

而我影完相，就同Chelsea一齊出去trick or treat囉。。。

先睇睇我嘅收鑊，下次再介紹過程！

題外話

我自己覺得，肥鬼阿媽去個的“教師太空人訓練計劃”真係好好，好過只係擺隻太空船係香港“表演”，得個擺字，擺幾耐都無用啦！！咁啱，係呢幾日又睇到香港一的報道，話新一年施政報告入面，教局提議，要攪多的國民教育，例如學校老師帶學生返大陸交流的交流團。

而某教育界議員的回應竟然話“驚的老師會變咗做領隊”？！我當然希望，呢個唔係全港老師嘅回應啦。唔好話學唔學到野咁高層次啦，cheap的咁講，有得公費去交流，都幾好呀（去得政府攪嘅交流團，點都有的自己去唔到嘅地方瓜！）。而且，個提議都係啱啱出，細節又未公佈，就有的咁負面嘅回應！可能個提議講緊嘅，只係一個老師一年帶自己個班學生一次呢。如果的老師都咁抗拒接受新事物，又點教學生呀！