做到‘老’（20250315）

時間去番2019年，嗰時腥港政府嘅勞工福利焗腸 羅領導人，要將領取長者綜援資格由60歲提高至65歲，仲話“當大家都120歲時，60歲剛剛是中年”。

=======

依家韓國呢，就反轉嚟講（同一個意思嘅）說話。

啲‘真’青年人搬走咗，所以依家49都係青年，要‘俾’的資源過你。

天下無免費午餐。

依家49歲都俾資源你，後面要做到79歲都不遠了。

======

英國

由2010年開始逐年延遲女性退休年齡，直到2017年女性同男性一樣65歲退休，到2021年再一致提高到66歲為基礎退休年齡。

仲有鼓勵大家延遲領取養老金，遲攞有獎勵。

===========

日本

日本自早年開始逐少逐少咁延遲法定退休年齡，從最初的55歲延遲到65歲，更在2021年開始實施“高齡僱傭安定法”去保障老人就業機會（即係你想打工一世都得！僱主唔可以唔請你！咁似我地的腥港小巴司機？？）

另一方面，佢建議大家“靈活”領取養老金。

越早開始攞-＞$$少的，越遲開始攞-＞$$多的。

做法：基本領取年齡仍然係65歲。係2022年開始，60至70歲的都可以跟身體狀況去‘靈活’領取；不過，60-64歲的每提早一個月開始攞$，養老金$會減0.4%（例如$1000減$4）；反之，65-70歲的，每延遲一個月攞$，養老金會加0.7%（例如$1000加$7）

大約就係，本來65歲時可以拎$10,000，

如你想60歲就攞錢，咁你只得$7,600；

但係你等到75歲先攞，就可以拎到$18,400。

=========

法國

係2023年，法國總理繞過國會，引用憲法條款，強行通過將退休年齡由62歲推高到64歲。

另外，2027年開始，你一定要供款足43年，先可全額領取養老金。

==========

究竟以前的人，有無‘退休’呢個慨念呢？

講緊嘅係‘工業革命出現’嘅以前。我估係“無”。

以前的人，普遍都係自力更生，自負盈虧，自己打自己工，養兒育女就係將來老了的倚靠，而且一生都在儲錢自己將來養老用。總之就係，的錢（無論多少）都係揸係自己手中自己話事。

依家呢？為别人工作一生，點解會變得咁根深蒂固？

因為自己為自己負責任，禍咗嘅時候無得賴係别人身上？風險太高了，將風險傳比僱主，自己就可以安安落落過日晨。

換來呢？你窮一生打工，窮一生去交稅，最後（你以為）“政府”會用‘幫’你儲嘅錢養你。［財過光棍手，一去無回頭］呢句我地由細聽到大的教條，點解的人又盲目的覺得唔會發生係‘政府’呢樣嘢身上？

到最後生殺大權放咗比人，肉随砧板上，所以變成你年齡越長越年青。

========

社會主義計畫的其中一個因素，係預計人口比例（生育率與死亡率）會好似紙上談兵咁完美嘅比率去發生。可以講過往100年（1920-2020）條數都尚算好地地。

無他嘅，戰後嬰兒潮，全世界的家庭都基本生10個8個細路。新血基數大過老人基數幾倍，就好似龐氏騙局咁樣，每個新人每日都揾到5個新血的話，條數係唔會爆架，日日都係用新血錢冚舊血錢之麻。

好啦，依家全世界人口小子化，全部家庭一個起兩個止，另一方面（直接啲講）老人死得唔快，仲越嚟越長壽，兩樣炒埋一齊，唔夠煲蓋冚煲，咪唯有叫你唔可以咁快水滾，煲耐啲先。

照咁計，我仲係bb班，有排先到青年，依家開始出去務農，應該可以幫補吓，再唔係就跟大隊躺平算喇。