Il Mercato Trattoria

嚟咗呢度唔夠一個月，就揾到我們最喜歡的餐廳。哈哈哈，我阿媽睇到，就會話我：果然係為食而生存。。。。

其實住係酒店嘅呢個月，係肥鬼返工的日子，我地都係三文治或杯麵渡日，基本上有熱食已經好開心，所以相對嚟講，好多餐廳都好好味呀。
(酒店樓下的小小餐廳都ok，不過我地所有菜式都食過了，真係食到悶悶悶出鳥來)

而呢間意大利餐廳堅係好味，我本來唔係太鐘意食意粉pasta類，但第一日嚟係個日，唔知係肚餓呀，定係個意粉汁實在太好味呀，暗暗就係心裏加分了。仲話要快嚟再嚟食，試埋其他菜式。

第一晚嚟到，我地兩個都成日無食過嘢，待應比咗張細枱比我地，我地係咁點咗好幾樣食物，仲想叫佢全部一齊嚟啦(我地嗰日真係打晒鼓！！) 但係張枱實在擺唔到咁多，佢就幫我分開上。。。

叫咗個squash soup 同 veal cannelloni (嗰晚太黑了，又肚餓，狂風掃落葉式清了，呢張係今日再去食嘅時候影嘅)

呢個veal canneloni, 係得兩條，個汁好味，粉皮不厚，啱啱好每啖都有的汁同皮同肉。。。

跟住我點咗海鮮意粉，肥鬼點咗羊架

就係呢個海鮮意粉seafood linguine，個汁鮮味到為咗的汁，我要食晒的意粉，哈哈哈

七成熟的羊架，有六條，很充足的份量(呢度有另一間餐廳，貴5蚊得4條) 加個傳統的洋葱磨菇燒汁，好彩我地坐係一個黑暗角落，無人留意我地落手食，仲要不停點個的汁。。。哈哈哈

嚟到晚餐的尾聲，一睇個dessert menu, 樣樣都想點，我地最後決定order 兩個係到食，order 兩個番去食

呢個tiramisu cheesecake 有的失望，再去意大利餐廳，就只會食傳統的tiramisu, 呢個有的實同咖啡味唔夠。。。

但係呢個classic vanilla torched creme brulee. ... hum. .. mamamia 暖暖的creme 脆脆的糖面，可以的話，真係想 lam 乾淨個碗。。。

今日再去，個待應 Jamie 先生一見就認得我地，仲話我地咁快又返嚟，其實除咗食物非常好之外，Jamie 先生服務一流，很細心，嗰晚除咗我地張枱，佢其實仲有另外一張8 人枱，但佢從無忘記我地，成晚不停行過嚟裝下我地食咗幾多，預時間去跑下一道菜，所有食物都係熱辣辣的。仲要係佢人都很風趣又非常friendly 我同肥鬼都覺得很慶幸啱啱嚟到呢度就識到朋友。

今日係下午3點嚟食早晚飯，未有其他客仔，所以有時間同我地傾多的，佢話佢都去過香港。。。個機場兩次，問佢轉機去邊，原來同我地一樣，佢都好鐘意巴里島，仲要同肥鬼一樣，有愛爾蘭血統，所以就更投契了。

呢次，我點了 seafood zuppa 非常鮮甜海鮮湯，有好多herb seasoning 調和海鮮的味道。。。

肥鬼就encore 佢個veal canneloni

主菜我點咗 beef tenderloin, 又係七成，入口唔洗"趙" 軟熟 juicy

肥鬼就食意大利名菜 肉丸意粉 佢話好味到可以比美肥鬼媽親手整嘅咁好味。。。

今日甜品，我地兩個都係creme brulee

帶回家的，就係呢件roulade, 係檸檬蛋糕外面包椰絲cream. .. 很清 唔太酸 yum yum yum

另一件帶回家的甜品，因為長途跋涉，返到嚟變晒樣，但係無損味道。。。

呀！仲有就係肥鬼發覺自己完全轉晒的啤酒味蕾，以前佢淨係飲嗰啲好清好淡號啤酒，依家越飲越黑。佢上次嚟，係飲Lunenberg, 咖啡 + 古力 嘅stout 黑啤，今次嚟，就試咗 propeller porter, 都係黑啤 但係普通stout, 無lunenberg 咁好味。。。

係我地用完外地津貼之前，一定要番嚟食呀。因為我好想試佢地嘅野磨菇軟飯 wild mushroom risotto,  唔係日日有架，另一個就係carbonara 煙肉忌廉意粉，呢兩味菜都係好傳統的意大利菜，連呢兩樣都整得好就真係堅！！！