南瓜工作室

上次去咗 Aunt Pam 屋企，又食又拎個的“新鮮自家製”蕃茄返屋企，同時又見到好多大過我個頭嘅南瓜，唔係要嚟食嘅，咁要嚟做乜？？？
開估 － 今日答案：南瓜工作室。
佢地呢邊的人，真係好佩服佢地，過節日真係好有心去裝飾佈置同做好多傳統野，香港人講真有心都無時間做，所以，要講節日氣氛，呢邊真係好好多。。。
就係為咗Halloween，每年肥鬼阿媽呢邊都會有家庭聚會去雕南瓜，的南瓜咪就係由 Aunt Pam 提供架囉。。。

首先，開始時，每人配給一個南瓜。。。

呢個係 Chelsea ，係肥鬼嘅表妹 ( Aunt Pam 嘅女)，睇唔睇得出高過我嘅佢得13歲渣？！佢個南瓜係個晚咁多南瓜之中最大個嘅。

肥鬼阿媽就因為懶，搵個特别細嘅，佢話佢會最快整好！可以好快收工咁話！哈哈！你睇吓，連把刀都成正比架！

跟住，係個南瓜嘅天靈蓋位開頂“帽”先。。。
大家都好醒目咁，開圓形帽就算，就係得我「賴醒」，無經驗學人開星形帽（無法喇，飲得太多東瓜盅麻！哈哈）
結果呢？就係人人個南瓜都有個“叮”嘅，我嗰個本來都有架！但就係比我呢個暴力狂，係拔個帽出嚟個陣，拔。。。斷。。。了。。。！！

暴力狂罪證。。。本來阿肥鬼係無心機幫我影相架，但係佢同香港的狗仔隊一樣囉，一見有大新聞可以做，即刻好積極咁埋嚟幫我影相。。。

之後個工序就係佢地覺得最核突嘅 － 抓的南瓜核出嚟。。。我就唔係咁覺囉，因為。。。有得食。。。食乜？

就係瓜子！我地將的南瓜子洗一洗，灑的鹽，用350度焗佢大約15-20分鐘，咁就食得喇！就係呢個時候，我先發現，佢地都會食瓜子，但佢地係連殼食嘅！？

呢的就係製成品！哈哈！一路食一路雕南瓜。。。

呢位好專心嘅女士就係肥鬼表姐Mia同埋

下面呢位雕到身水身汗嘅，係Harold（Mia老公），佢地兩個夜的先到，但佢地真係好比心機雕架！一嚟到就開工，而佢地雕嘅圖案，係最複雜嘅。。。

Harold坐係我隔離，佢真係好專心，人地同佢講野都唔知，仲要雕到透晒大氣。。。哈哈

好喇！大家見我咁詳盡嘅報道，就知道我梗係掛住睇人整，自已就慢吞吞啦。。。而最快完成嘅同學，真係肥鬼阿媽！ 因為佢個南瓜細之外，佢嘅設計係最簡單嘅！

熄咗燈之後嘅樣。。。

作者與傑作：

呢個係Mia嘅夜光貓

呢個係Harold嘅海盗

哈哈！呢個就係我嘅！低能南瓜一個。。。

睇清楚的。。。

同肥鬼阿媽嘅傑作坐埋一齊。。。

南瓜工作室大合照

製成品合照

熄晒的燈嚟睇真係好靚！