摘蘋果

一入咗夏天，阿肥鬼就話，會同我去蘋果園摘蘋果。。。講吓講吓，講到十月尾喇，連佢都知再唔去人地今年就關門大吉喇，先同我去到。。。

係門外面就已經見到一個好大嘅穀倉，當然入面的間隔就係執過嚟啦，暫時唔係真嘅穀倉咁樣！

鬼咁大隻字 － Fresh Apples（新鮮蘋果）。以為發達喇！點知。。。

係未出發之前，肥鬼已經懶叻咁，上網加打定電話嚟，問清楚仲開唔開（因為一過咗蘋果當造嘅時候就收檔架喇！）所以，我地一行五人好開心咁衝緊入去。。。
仲係門口仲見到人咁大嘅南瓜

大到可以比小朋友坐上去嘅。。。

呢個小朋友係個日同我地一齊去摘蘋果嘅肥鬼同事Jon嘅女Tristen，阿Jon嘅老婆Melissa都有嚟，就係個日，佢話比我地知佢肚入面又有另一個girl喇，不過阿Jon好快就會轉去Washington個邊做，應該聖誕之後就搬走喇！咁我就有排都見唔到個new born baby girl。。
係門口仲有南瓜山。。。

我地一入到去問個櫃位小姐，佢話摘蘋果活動已經係上星期一停停停停咗喇，依家得番賣蘋果！！“咁你買唔買吖？”（最後呢句我加嘅，係問我個死肥鬼架。。。）
我地就係望住呢個‘大囉油’員工，輕嘆嚟遲一步囉。。。如果我地早一個星期咁多嚟，我地都可以好似佢咁樣自己去摘蘋果架。。。

係知道摘蘋果無望之後，就週圍行吓呢的果園喇。
其實我地呢便的農莊 (Barn) 呢，通常都唔係得一種果嘅。我地上網查個陣，就搵到有草莓園啦 (Berries) 瓜類農莊啦 (Melons) 桃類農莊啦 (Peaches)，佢地因應當造嘅時間而有唔同嘅開放時候，不過就好似以蘋果同士多啤梨最普遍受歡迎。
係未嚟之前，我以為呢的果園係好似香港個的荔枝莊一日遊咁樣，比咗入場費，就可以任摘任食，點知睇到blog 友糟糠個blog先知呢便係唔會有咁旬嘅野嘅，所以無得摘都唔係咁失望。。。
而係呢個農莊入面呢，就有
一）自由行走地雞。。。

二）監躉山羊

淨係睇上面兩樣圖畫，就知自由價更高。。。因為自由雞就淨係得食草，反而監躉羊就有南瓜食，攪到的自由雞成日係監獄外圍搵飯食。。。

搵乜野食呢？係監躉羊宿舍隔離，原來有部入錢機，入一個quarter($0.25)就會出一個手掌咁多多嘅監躉羊零食，我地就餵咗兩次到啦，攪到呢隻小小監躉羊跟住我地行嚟行去，所以就同Tristen合照多一張喇。。。

連Tristen都走去扮羊。。。（咁樣都夠膽話自己係zoo。。。）

而係呢個果園嘅另一邊，就係佢地個南瓜莊，但係就係揸車走個陣先見到，所以只係影到呢兩張“動感南瓜”

因為無得摘蘋果，最後我地只係買咗綠南瓜。。。

蘋果冬甩。。。一袋六個，返到屋企已經得番兩個。。。

同中型南瓜一個返屋企煲湯。。。哈哈