我成日去行救世軍二手店，一行就幾個鐘。
唔係佢有好多嘢睇，係我不停係到尋寶。
我最鍾意揾made in Hong Kong 嘅舊嘢。
今日比我見到呢的。
香港製衣業曾經好風光，70年代好多家庭同我屋企一樣，阿媽會去製衣工廠拎外補返嚟屋企車賺外快，通常就係車領口或口袋（一件成衣入面細件的部份），我就坐係旁邊剪線頭或者係反領口個尖尖。
你知唔知反嗰個尖尖係好巧技術架？
係要將左右的紙口位向後摺，用手指一反，用指甲頂盡個角位，再用拆線义勾個角，咁先完美。
上面呢件真係非常之70年代嘅fashion....
呢件嘢勁呀！係crown colony所以就算係15.99我都買咗佢。
我其實係好少買嘢嘅，梗加好少買咁貴嘅野（！！）我嚟行二手店，揾舊嘢，好多時都係的‘’唔等使‘’嘅嘢，所以行完一輪諗過度過我又放番低佢🤣
呢個珠珠袋。。。
我以前係跑馬地返工，好多時放工會行落去灣仔搭小巴返屋企，又可以行街。
途經灣仔道或莊士敦道，有好多出入口時裝店，可以買剪牌貨。
有一個商場門口，成日有個阿叔擺檔係度賣呢的珠珠袋，佢有好多款嘅，同埋靚好多，精緻好多，不過好明顯係樣板貨或‘次貨’，因為每個袋都係只得一個。
曾有朋友提議我同阿叔攞貨去美國賣。但我個人根本就係懶底🤣🤣又無商業頭腦，諗諗吓之後咪就係得個諗字囉。
嗰時internet只係剛興起的階段，未有etsy/shopyfy呢的綱站；我搬過嚟之後個人懶洋洋的，用一個好慢的步伐嚟溶入生活，要到好耐之後先發現farmers market, flea market或者garage sale呢啲嘢。。。
No comments:
Post a Comment