6月29日星期一，去了住係市心的阿婆屋企做花王工作，佢屋企就係一間中學隔離。
正在除雜草之際，聽到銀樂隊的音樂，抬頭一看，是中學銀樂隊在練習，因為嚟緊星期六係七月四號國慶，每年呢日，聯校銀樂隊都會帶領小鎮的國慶巡遊，所以呢個應該係最後預演。
如果你有睇過呢邊啲中學大學的足球比賽，係中場休息時，通常就係銀樂隊大滙演，幾十人到百幾人，排例整齊的向前行，向後行，打斜行，什至U-turn!!!!
全部拍子步伐一致，每次睇都感到驚嘆！
呢個係一間大學 ( Texas A&M ) 的銀樂隊滙演。
佢地勁到可以打横打直打斜 再加倒轉咁行進，仲可以不停做出好多隊形(formation)，我諗基本原因係佢地全部人都玩樂器嘅，所以會對拍子節奏的敏感度好高，不過都唔可以忽略，佢地一定有長期練習的功夫。
===========
以前係香港，曾經做過童軍領袖。
有一年，我地旅團參加了步操比賽。
嗰時的比賽規則，係每隊要求有人數下限，好似係至少要24或27個人（？），因為太少人得小貓三幾隻係點操都睇唔到隊形。
咁啱嗰年，我哋旅團好好彩有頗多的新團員（少子化現象係好耐之前已經發生，同埋的細路開始有好多其他娛樂，無乜人再有興趣參加制服團體），咁啱個個都願意參與，然後我地再係其他旅團，揾的friend嚟湊夠人數先有得玩！
童軍步操比賽，係全隊其中一人做司令企係場中間，比口號（指令）我地全隊人，我地係要跟口令去開始前行，其間全套步操必須包括前行，左轉，右轉，步行時比禮，行進間轉彎，暫停立正再前進等等等等
步操比賽講求的，係隊員與司令的默契，全隊人的融合程度，達到呢個目標嘅方法得一個，就係‘’操‘’。
嗰時我已經畢業做緊全職工作，每星期有三晚，一放工即刻趕去球埸開始操練。
淨係落腳呢一下，都要練好幾日。因為如果有人沒有將隻腳，提高到大脾與小腿成90度，就立到放腳，咁踏落地的聲音就會好似落雨咁樣“噠，噠，噠，噠”，而唔係齊整的清脆的“噠”一聲。
唔知係因為操練得多，投放咗好多汗水心力？定係人類的心理一般都係咁諗？總之係我地一齊做到“齊整的” “清脆的” 噠一聲，就會覺得好圓滿好有成功感！！
去到比賽前一星期，我地係晚晚操，嗰時覺得好好玩，操完就成班friend一齊去食宵夜，比賽最終梗係無贏啦！但係就比咗我呢個珍貴嘅回憶！
=============
到咗前幾日，見到2002年出道的女團，其中一個歌手，又走返嚟香港‘重出江湖’（？）
又睇番佢地嘅首本名曲：
第一樣就係覺得：“嘩！佢地跳得好齊呀！”
‘齊’呢樣嘢，係去到廿年後2026年嘅依家，啲韓團仍然都係咁追求跳舞好齊。點解人類就係咁鍾意“齊整”呢樣嘢？？
你睇吓，北韓最出名嘅表演，就係十萬人，“齊整” “合拍”地滙演阿里郎
大家有睇過嘅，都係覺得驚嘆，佢可以咁齊整合拍的做一個滙演（呢個表演好出名，為北韓帶來好多旅遊收入），完全忽略要做到呢個程度，基本上係要十萬人都抹去了“我”，當“整體”為一個“個體”咁樣去生存先做到。
=======
然後就係想到，呢班女仔全都40了。
你有無同時感覺好老又好年輕嘅感覺？？
如果我提提你，阿梅Anita當年死時也是40歲，你明我的感覺嗎？
依家睇住的餅女，由出道時20歲，眨吓眼到依家全都變了40歲，好似好老咁樣；同時間，Anita離開時也是40歲，風華正茂，仲可以唱多10年，20年，30年，40年。。。。
=========
嗰時餅女呢首名曲，我😑係唔like架。原因？
Wyman的歌詞實在太中了。🙄
其中有一句：
“為何男孩情願拋低女朋友
陪住老友通宵打機不戀愛”
我喺2000年識嘅小男友，一開始拍拖，佢就要去外國讀書，等到佢放聖誕假返嚟嗰十多日，為咗多的時間相聚見面，去佢屋企過夜，點知佢叫friend嚟通宵打機！！之後我自己一個起身返工！！😡🤬😡咁你叫我嚟做乜？？🤬😡🤬
依家諗番，呢段感情只捱得一年多啲貨仔，唔係無原因的。🫠
No comments:
Post a Comment