你覺唔覺，有時有一段記憶深深印在你腦海，但一同經歷的人係會完全無印象。。。
荃灣海壩街116號地舖新發祥鞋店。
係我記憶入面，有這樣一段情景。
時間應該係小學五年級或六年級嗰時，就快農歷新年的時候，那天中午至旁晚時段，阿媽正開始忙碌整餐晚飯（仲有好多新年要準備的食物），就同我地講，見我同細佬著緊嗰對鞋開始頂指喇，又就快新年，咁就叫咗阿爸帶我同細佬，出去買對新鞋過新年。
場景跟住就係嚟咗呢度。
嗰時我地住葵涌新區，可能係搭巴士落荃灣，不過更大機會係行路落嚟，我仲有印象以前嗰玻璃櫃係無咁滿嘅，仲會分唔同嘅款式咁去展示，右手邊男裝鞋，左邊女裝鞋，中間係細路，入面有的運動鞋咁樣。
但係你都睇到，呢間好明顯係老實型舖頭，即係款式唔會多，更加唔會有色彩繽紛好潮好型嘅鞋，只有好務實沉穩嘅款式。
最主要係，我地係同阿爸落嚟嘅，“阿爸係男人”，係從來都無興趣無耐性行街睇嘢嘅，說時遲那時快，我就試緊對鞋（都唔記得係我揀嘅？定阿爸揀？）
印象中係好悶的黑白的converse咁款嘅，就係鞋身好長的。
好似呢對咁上下？？
嗰時呢，我人仔細細，但係隻腳就已經好大，係同身高不成比例的腳掌好長，著呢個款嘅鞋就令我雙腳掌睇落再長多幾個碼咁樣。。。
但係，記憶中，我就係拎住呢對鞋返屋企！
跟住就係返到屋企，阿媽就問點呀，買成點？我無出聲行去阿媽到，佢望到我個樣，就係一泡眼淚但又唔敢喊唔敢出聲。。。
記憶好似係阿媽同我落去換過第二對嘅，但係我對後面換咗乜係無印象嘅，最清淅嘅就係前面呢段，阿爸係我未揀到就比錢打道回府，然後我懷住滿胸委屈好想喊的感覺咁樣返屋企。
呢個係咪叫做我嘅童年陰影？？
依家諗番係覺得好好笑嘅，但係又會諗，點解呢段情節會留低咁深印象？？咁唔鍾意呢對鞋？但係跟住換咗乜係無晒印象喎。
========
我幾次返香港，都會落去行呢條街，再睇吓呢個舖，我諗應該係自置物業，所以可營運到依家。🥰
No comments:
Post a Comment