頭髮
2021年8月2日星期一
今日想揾的髮夾，見到呢個形容詞，諗起我的頭髮嘅故事。
係我小學嗰時，學校係唔俾留長頭髮嘅。所以一上中學，我就留長頭髮。其實都唔知係真心鍾意？(睇下面就知) 定只係反叛 (可見壓力越大反抗越大的定理) 跟住一直都係長直髮。
直髮原因 1) 懶！唔鍾意嘥時間朝朝要早成個鍾起身 set 頭返學。
直髮原因 2) 無錢。其實應該係話，唔覺得想洗咁多錢去電髮。
嗰時個個女同學都鍾意攪做型，又 mousse (定型泡) 又 spray (噴定型水) 而我就例外，就咁所有頭髮向後梳，扎條馬尾就係我每日做型。
仲記得嗰時個潮流係扎馬尾都好啦，佢地都會係兩鬢耳仔上面邊留番一執仔頭髮落嚟。
我就最憎咁樣嘅！我真係一個怪人，用我阿媽嗰形容詞就係最憎有頭髮係到"嬲嬲憂憂"!!!! 就算係一條都好啦，我都要用髮夾夾到佢實一實，特別因為我係戴眼鏡嘅，所以左右兩邊面有頭髮飛嚟飛去，我覺得好鬼煩。
唔似得我的女同學/朋友，佢地全部都非常介意頭髮嘅長度，即係去剪頭髮短少少就會唔開心，我就一路都覺得，頭髮唔係長就係短架喇，剪短完就會生番長架啦！所以係我出咗嚟做野一排之後，突然間有一日好想玩野，係放工後去咗剪頭髮，由到腰長直髮，剪成咁鬼樣⏩
哈哈哈哈！！！依家諗番都好好笑，第二日返工的同事見到我，有的嚇到不知所措，有的係咁問我係咪比男友飛咗！！！哈哈哈！
玩完一輪之後，我發現短頭髮仲多功夫，又要成日修剪，所以我留番長之後就無剪短了，依家偶然發神經會花半日set 個捲髮，但係保持唔到幾日要洗頭，然後又要重頭嚟過，所以的人話人人都可以做到靚女人，只要唔懶就得，我就投降了，哈哈！
No comments:
Post a Comment