怪談
2021年8月1日星期日
聽咗好多年收音機鬼故，有好多都係旅行嗰時遇到嘅。
突然間想起呢件怪事。
當年同男友分手後，去了一個單人旅行，唔夠膽自由行，所以就報名一個5日韓國旅行團。
都唔知係好彩定唔好彩！單人報團，嗰時嘅規矩係除非比額外錢住單人房，唔係就會由領隊安排與其他團友 share 一間房。我答佢 ok 呀，當識朋友囉！
去到集合嗰日，原來有一個女團友比咗額外錢要求單人房，所以全程我*免費*自己住一間房。
其實係旅程中，我地都幾 friend 架，即係上旅遊巴會坐附近，互相影相，有傾有講，佢都話有的後悔啦，因為覺得同我幾夾可以 share 一間房都會幾好玩。(佢係因為之前去旅行試過同一個阿婆同房，阿婆有鼻鼾又成日不停問佢野，佢頂唔順！)
怪事就係呢，其中一個旅遊點只係中途站，晚飯後先抵達嗰間酒店，第二日就走嘅。講咗 9am 就係樓下旅遊巴集合去下一站。我唔想食早餐所以較咗 7.30am morning call 起身，係房執行李就等夠鍾落樓呀，等呀等呀，等極都未夠鐘，明明7.30am 起身沖個涼執吓野就到啦，我有睇住個鐘架。
然後突然 "dum dum dum" 有人拍門，就係上面兩個韓國導遊，佢兩個當時面色勁唔對路，係好緊張好緊張嗰隻，可以話係我開門一刻佢地係鬆一口氣 (驚會發現我自殺？)
佢話成車人係下面等咗好耐，仲話不停打上我房無。人。聽。
明明我房個電話 morning call 嗰時work 架喎？？？？
但係 morning call 之後我房電話無響過！
從來我都算係頗為守時嘅人，仲要係一個人去旅行，我都好留心跟從領隊嘅安排，所以嗰刻要成車人等我，我無乜多想淨係覺得尷尬多的。
但係過後再回想，嗰朝係心裏面有奇怪嘅感覺，就好似我係房入面嘅時間停頓咗，而外面嘅世界就繼續咁樣。嗰個年代係未有手提電話呀，所以我一路執野，望住嗰個鐘，到後來我係執好晒坐係到等夠鐘架，依家想起，總之個人嗰刻就係等時間過，但係又無意識想走出間房去樓下睇吓，就只係得奇怪嘅感覺，呢件咁嘅怪談事，我好有深刻印象，所以記到依家。
No comments:
Post a Comment