定位

2019年頭幾個月好忙，之後到有時間坐低落嚟嗰陣，運動就爆發了。
我唔係讀政政系 (呢樣都係近年先識！) 唔係記者，梗加唔係文人，只係普通人一個。

運動爆發初時，睇到一個 blogger 的一篇文，大概就是說自己對整件事有不一樣的睇法，不過唔會係網上詳述，淨係心裏有自己的信念就可以了。

睇完之後，自己放眼四周所見，就係網上突然間出現了好多幫派的政治評論人，唔知係邊到走出嚟嘅，民主的，中共的，表面民主内裏中共的，揾錢的，想整死香港的，天神論的，投靠美國的，投靠英國的，自治的，獨立的，真係你諗得到嘅都有。

但係佢地都有一個共通點，就係當你睇得呢的評論耐咗，你會發覺佢地好多嘅內容都係互相攻擊的多(實際有用的意見就無料到) ，由其是出唔出嚟遊行/去邊個主題集會遊行，每次有遊行前，就係一連串的攻擊，你又投共呀！你又假民主呀！你只係齋行無用呀！你捉鬼又唔啱呀！你放火又唔啱呀！數之不盡。

我自己覺得其實你係乜野門派都無關係，各持己見也是言論自由的象徵，但依家香港最需要係團結，所有互相攻擊的評論，對我嚟講都只係自私的推緊自己嘅意圖 (agenda) 而不是以香港人大眾前途利益作依歸去講你的實際有用嘅意見。越睇得多呢的咁嘅評論，越鞏固了我"都係慳番啖氣"嘅心態。當人人都係到發表自己嘅偉論，我就梗加下決心唔出聲。

2020.2.15 在縫紉班的路上

因氣温驟降，昨晚海面的水都結冰了

(波平如鏡的地方) ，

但係下面的暗湧一點都沒有停下來

(可見左邊的浪是很密集的)

呢的浪係出面大海吹緊入嚟港灣呢邊嘅，

但係港灣的水面昨晚結冰了，

的浪就係水下面過，

到了河口呢邊就湧番晒上水面。

所以上年 2019年個 blog 可以話係空白一遍。

但係，依家2020年的我又有了唔同睇法。
21世紀，同3000年歷史唐宋元明清最大分別係乜野？
就係互聯網嘅出現。

[ 歷史從來都係勝利的一方寫嘅唯一版本。]
但係，我地依家有嘅係互聯網，唔係淨係得皇上一個走卒去寫史記留傳後世。
我地每個人都可以記下歷史。我們自己的歷史。
現在香港每日發生嘅事，對美國人，對英國人，對日本人，對世界任何一個國家嘅人都只係輕於鴻毛，但係對我呢個普通的香港人就是重於泰山，我地自己都唔珍視自己嘅歷史，中共要洗走晒佢，又有幾難。

呢個 google,  同 youtube,  同 facebook 全部都有中共嘅鬼 (間諜 / 內鬼) 只要我打多幾隻唔見得光嘅數字 1 2 3 _ 5 _ 7 _ _ 10 同埋嗰的中共支爆 黑警 武漢肺炎 等等字眼，除時第二日就成篇文無咗都唔奇！但我地係咪就咁就放棄？

再者，依家互聯網講嘅係演算法。
即係海量嘅新聞資料 (唔理真假) 只要夠多人傳播，佢出現嘅次數就越推越高，搜尋答案的排位都會越推越高。大陸同俄佬不停用5毛同機器去帶風向洗走晒的真嘅新聞，再不停傳的假野出嚟。我地越唔寫，就代表係互聯網呢個 水塘入面，只有假資料，你要釣到真新聞嘅機會係零。

我認我唔想係到寫自己嘅想法，一部份原因，係唔想同人辯論，我真係無辯論嘅天份。
而現在，世界已經變了，已經變到係你講真話就係唔啱嘅年代。

我給自己嘅定位，係盡量每日記錄今日發生過嘅事。
這是我作為香港人，為自己成長的地方，作一個記錄，縱使我呢到只係得寥寥可數的幾個朋友親人會睇，但係至少盡我能力，比我侄仔，兒甥女係20年 30年後知道當年今日發生過乜野事。