女性專題：漏M!!!! (男生可以就此略過)

講真，已經毫無印象自己究竟係幾歲開始有月經！一個咁有意義嘅日子，因為自己懶，無寫日記嘅習慣 (更加無乜自律同毅力) ，就連同其他青春的記憶，慢慢逐少逐少的係腦海中飄走了！

雖然我已經一把年紀，淨下來的月經次數，相信已屬於倒數嘅階段，但係我想講，直到依家，咁大個人，每次月經嚟，都係會帶給我漏M的困擾！！！困擾！！！困擾！！！(迴音。。。)

(講開又講，以前的人話女人35歲生仔就是高齡產婦，但係你睇吓依家46歲先至嚟生bb嘅都大有人在。最近睇到嘅係有個以前毛線藝人的太太， 52 歲生 bb 唔知道佢係咪用 IVF 定其他，如果佢係純天然的製造呢個bb咁咪即係52歲仲有M??? 我以前讀 bio 係話40幾歲就更年期喎？？？究竟點架！)

年輕時仲係香港同屋企人住，每次漏M 阿媽就會話"咁大個人仲漏M" ????????????????   我想的嗎？你係有萬無一失的妙計嘅話，我都好想知喎！！！

細個作為女生都係怕尷尬嘅，漏M梗係驚惶失措喇，但人越嚟越大個之後，係灰！！！已經包到實一實呀；已經四平八穩咁坐咗係到郁都唔郁呀；已經每3小時去檢查呀，最後又是回頭一望，一灘血，眼都鯨了。

發現漏M 嗰種灰，是不能想像的。
由其係我。你想像到與想像不到的情境，我都應該試過。中學女生白色校裙，白色褲，工作制服裙，辦工室坐嗰張凳，去 camp,  酒店，屋企張疏化 (sofa) 車/公共交通工具。。。

最最無耐的應該都係漏 M 係張床吧！先唔好講一大早起身，本來就要趕頭趕命咁去疏洗準備返工，點知突然發現要執床換床單 (不能等的，的血越乾越耐越難洗！) 再灰的就係連床褥都有，呢個簡直係人生不能磨滅的污點！！！就算買晒所有超市的除污劑，都係會有淺啡色的一個印係到，歷久常新咁樣證咁你又失手了。

然後又試過尋晚換完床單，今日起身又嚟過！(肥鬼已經見怪不怪了，最好我日日換添，因為佢話換新鮮床單嗰晚瞓得特別好架！) 而我就簡直想死。某研究數據顯示：女性殺人犯，係大多用毒藥殺人(不見血的) ，而男性殺人犯係大多數直接殺人(見血的) 不難想像點解！我個個月洗血跡的經驗話我知血跡係好難攪的，所以唔好再煩我！

我係網上揾過嗰的 "解決漏M最好的12 個方法"。

最普通人人都試過嘅，我諗就係用兩條啦！有人用兩條係 T 字型咁貼啦，有人就打直駁到好長咁啦，我兩樣都試過。
結果，嗰晚佢係側邊漏！！！激到想殺人！！

有一個就係著緊身褲啦，係比 legging 的，務求佢入面唔好移位。而我自己用的方法，係非常阿Q架。以前係香港，有M嘅時候我盡量唔會坐低架，由出街返工直到返屋企，可以嘅都係行同企，所以返到屋企條腰真係斷咗嘅。
依家呢，無做野了，有M的日子我真係盡量都唔出街架！

我已經係好好彩的，無乜好嚴重經痛問題，但攪到腰酸背痛就梗嘅，仲有乳房又漲又痛，然後因為怕咗漏M，所以，我夜晚係瞓唔到架。因為我瞓覺係好似打風咁架(阿媽話嘅) 我唔想自己瞓著咗郁嚟郁去，我就要好似僵屍咁攤係到，全晚保持一個睡姿咁瞓，所以整晚不能沉睡好醒瞓，結果就係起身之後更加腰骨痛！！！

曾經嬲嬲哋有諗過，不如買成人紙尿片算了！！！成條底褲都係白色太陽槍 (white sun gun - 中學時係用呢個暗號架，唔知依家的細路仲係咪用呢個名)

不過係 2020 年新一年新開始，我開始咗一個新方法 (係呀新年流流第一日就M) ，就係放我件雨褸係床先瞓上去。
得咗！
唔係無漏，係漏咗都唔驚你呀！哈哈哈哈。
果然係人頭豬腦，漏M幾十年依家先諗到。