愛爾蘭 - 無聊睇電視 (3) 美國冒險樂園？

咦！乜佢地有 crossover 過咩？
唔係呀！但係上面部機係咪熟口熟面呢？
我自己叫呢部野做 "跌錢機" 哈哈哈。

以前係香港，中學後期曾經有一排，放學就跟同學去美國冒險樂園玩。

點解只係後期先會去呢？
因為中學早期 (美國冒險樂園登陸香港之前) 香港有嘅就只係機舖 (機竇) ，呢的地方好快就比黑社會類型嘅人 takeover 咗，再加上間間都又黑暗又大煙(食嗰的煙), 而且一般亞洲人家長都係會話尋迷打機呀 / 死飛仔出沒嘅地方呀 / 群埋的黑社會學壞呀 等等等等原因而唔比去。(由呢樣野可見的家長係對機舖非常之 stereotype 或者 bias 嘅，情況就同波樓一樣， billard room 都係好無辜的！)

美國其實統稱呢的地方叫 Arcade Game Centre 佢地係有晒冒險樂園嘅機同機舖嘅機嘅，所以係幾歲嘅細路到十幾歲嘅少年都啱玩，就係比青少年去消磨時間嘅地方，依家都仲好多地方有 e.g. 遊輪！！主要就係等大人同細路可以分開各有各玩。

而我就係到冒險樂園開咗，又大個的，有多的零用錢洗，先會去。每次去到，行一個圈之後，我淨係鐘意玩一部機。就係下面呢部，依家好似變晒做保齡球機。

話時話，其實我以為冒險樂園早就執晒，係 search 嗰陣 先知原來佢地死過番生。依家又開咗有好多分店。

到再後期，有一間分店係連住個地鐵站嘅，所以成日返工出入都會經過，發覺最常見到嘅唔係年輕人，竟然係老人家！！！佢地個個都一大袋銀仔，個個都係玩呢部跌錢機。嗰時我唔明架，咁悶，又慢，有乜好玩，再加上我一的都無"賭"嘅 dna 我覺得佢會跌錢嘅機會係零，所以更加唔明。(後來就明了，後面講)

講番呢個愛爾蘭 game show 同我之前比較美國嘅 game show 一樣，美國的遊戲真係好膚淺，呢個愛爾蘭嘅節目，特別在佢係要答啱問題先可以跌一個銀仔。當然你仲要好技術性咁樣去定位你個銀仔，睇吓係邊個位跌最有機會撞/推的銀仔出嚟。

呢個遊戲節目開始嘅時候係有4個參賽者嘅，第一回合：每人有3個銀仔機會，要答啱問題先可以用你個銀仔。第一回合最多錢的參賽者，就可以出線到第二回合。第二回合：一共6種時事常識範圍，最高難度的問題有3個銀仔，最易的問題得1個銀仔，如果你對那個範圍無信心 (例如：天文學) 你可以揀最易的回答。

係第二回合開始時，主持人會將一個特別嘅銀仔放入部機到，參賽者要用6條問題 (答啱晒有最多18個銀仔) 撞/推那個特別銀仔出嚟，就會得到大獎。

我同肥鬼睇咗好多集，致勝嘅關鍵，竟然係"常識"!!! 好多年輕人參賽者，就算進入到第二回合，但佢地真係好多野唔識/唔知，根本就唔夠銀仔去撞個大獎出嚟。

反而係好多上咗年紀嘅參賽者，唔知點解，佢地嗰個年代嘅教育係比較"博覽" 的，我見過有人真係可以6條問題盡取18個銀仔。

====

講番點解老人家鐘意玩跌錢機，你有無留意，如果去賭場你會見到好多老人家鐘意玩老虎機？
道理係一樣，就係呢兩款機玩嘅係鬥長命鬥耐性。
呢兩部機同樣都係入最少嘅錢 (資金投入最少)  但係，如果撞啱，跌出嚟嘅就會好多。咁你要撞啱嘅機會率係同時間成正比嘅，試問世界上邊到會有人比老人家有更多的無聊時間？所以呢部機對的老人家嚟講，就係可以用幾個銀仔坐足一日嘅消磨！