愛國之心

2020.3.19

同屋企人講電話，係全球一體化之下，我現身處加拿大，有家人在英國，也有家人在澳洲，主要家人在香港。

我地全部都係"敵不動我不動"嘅主張，所以唔明的人點解會咁樣飛嚟飛去？保持原地不動盡量唔出街，感染機會係零，係外國普遍城市都係低人口密度，自己揸車出街感染機會都仲係好低好低，但係你係香港人口密度超高，仲要你一出街就用公共交通工具，個感染機會就高咗好多，更何況係飛機？超密閉空間入面長時間近距離接觸困獸鬥，咪玩啦！

另一個主要原因，其實係呢到已經係我地嘅家啦，仲走去邊呢？
之前同朋友傾計嗰陣講過，我地大家都好唔明依家的人嘅愛國心究竟係邊到嚟嘅？

我好記得，讀小學嗰時本手册第一頁個人資料，係有藉貫呢樣野嘅，細路嗰時從來都唔知"藉貫"係乜野嚟，問阿媽呢到填乜呀，佢話廣東惠陽咁咪照填囉。

雖然細個每年聖誕都會返大陸，但如果你係同我咁上下年紀嘅，都會知小時回鄉係乜野一回事！

好似走難咁樣，帶好多物資番去，大陸治安一步一驚心，過關時人頭湧湧，無秩序無禮貌，偷野搶野無日無之，勁多乞兒係火車站或飯店門口圍埋嚟，環境污糟邋遢，街上的汽油味，香港都唔算先進但係至少有電有燈有熱水，而返到去就好似去咗石器時代咁樣，總之就係恐怖。

自己唔係嗰到出世，唔係嗰到長大，又點會無啦啦有故鄉的感覺？更加唔好講乜野藉貫/故鄉，已經全部係呢的唔好嘅印象，更加唔會有愛 / 光榮嘅感覺。係完全無感覺，又何來感情？

到大咗之後，突然間填乜野表格都要填 nationality... 乜嚟架？點填？的人話填 British咁就填 British 囉，但你問我，我都好老實答你嗰時我係一頭霧水架，可見當時我嘅生活真係距離政治好遙遠。。。

所以你問我，我真係唔明的人點解突然間咁愛國？
仲要係咁樣嘅疫情之下，你覺得返大陸真係會有救？