祝大家
"盒"家平安、花開富貴、順風順水、百毒不侵、
無本生利、身體健康
今日係農曆年初三，俗稱赤口之日，根據慣例今日係去拜神之日，所以，肥爹同老媽子都去了靈谷園拜神，而我就喺最後一天爭取時間休息一吓
... 其實都係懶啫
... 明天又要返工
，雖然我其實成個幾兩個禮拜無返工(病假!!!! 係我十年工作生涯最最最長的一次....之前從來未試過)，但係都覺得很難接受這現實
....。在吸入了很多的冷知識後(即是看咗幾粒鐘的national geographic / discovery channels)，看見屋企的花開得很燦爛，忍不住又攪作一吓
，炮製了以上的一張年相，出來效果也自覺相當不俗
(忍唔住又要贊吓自己的美術天份
)粉紅色的玫瑰花，是我今年的情人節禮物。當日收花之後，我打俾肥鬼佬，話佢知有人送花俾我，"重"要係粉紅色的玫瑰，跟住佢就淨係不停問係邊個送???係邊個送???係邊個送???
然後，我就話我老媽子同家姐都一人有一朵，佢跟住就估係我肥爹，
因為佢唔知我肥爹的做人金句嘛，梗係估錯啦... (肥爹金句:我折現俾$80你食咗好過!!!) ... 其實係個一刻，心褢邊又真係幾開心，覺得有人好緊張自己，但再過耐啲，又會反思，媽子都成日很緊張我吖，點解又成日無耐性應媽子呢???下次，我要做番好啲先得....送玫瑰花的人其實係好識貨嘅豆豆，係全部玫瑰中淨係睇中呢款... 全部都係$15/支, 得呢款係$25/支，睇嚟，豆豆同我一樣，都係天生好有taste、同品味、同藝術氣質的人
係屋企休養了個多星期後，有番啲精神，在17/2終於出關，所以就同媽子去花墟買花(其實咪都係做搬運工人囉，都無乜體力行好耐，總之媽子買晒要買的便回家了，我成日都係淨係企埋一邊等之嘛)，然後惗惗吓，見啲玫瑰咁孤伶伶(一個樽一支)，就買啲花返嚟陪吓佢哋。我好鍾意鮮艷啲嘅顏色，睇落精神啲，fresh啲，bright啲，就買咗呢啲叫荷蘭小牡丹，襯落真覺賞心悅目。
No comments:
Post a Comment