下面會有我的手指甲近鏡，小心。
嚟呢邊之前，曾經諗過過嚟之後會做乜嘢工作。
朋友曾經叫我去學做手甲，當興趣又得，當工作又得，不過我之前係香港份工忙到嘔，好快就將呢個念頭擺埋一二邊lu...
無實行嘅另一個原因，係做手甲對我嚟講只可以當興趣做，當職業做的話，我會要求自己攞 full cert 做全套，即係做埋脚，但我真係過唔到自己，夏天時成日係街見到的人著涼鞋對脚好駭人，真係反胃。
現今呢個變態嘅 customer is always right 年代，大把人唔沖涼就去做按摩 (我見過呀！佢同我同時抵達，我聞到佢體味！！！) 我都好肯定大把人會唔洗脚就去修甲，所以我自己好配服做呢類服務性行業嘅人。
到嚟咗呢邊之後，就發覺真係唔好講笑，呢邊啲女士，真係好鐘意去 nail salon (手甲美容舖) 係真係大大小小嘅 mall (購物商場) 都一定有最少一間，仲要成日都有客係入面嘅。
其實中文俗語講嘅 "佛要金裝，人靠衣裝馬靠鞍" "先敬羅衣後敬人" "只認衣衫不認人" 等等，好多係得個講字。
要講對外表儀容整潔的要求，一定唔夠外國人咁樣真係去實行。
唔知點解，好似我阿媽嗰一代咁樣，會有一個迷思就係覺得"唔打扮" = 節儉的美德 ??? 或者會打扮就係大花筒 ???
但係，其實講緊嘅打扮，都只係出街要有基本化妝啦，要梳頭，要用止汗劑，衣服唔使日日新款或貴價嘢，但係用心去配搭。
好似肥鬼咁樣，佢一定日日沖涼洗頭，剃鬚剃鼻毛剃耳仔毛，搽止汗劑同香體露，每日著嘅都係乾淨嘅衫褲。仲有呢邊嘅女士，就算落街去超市，都會有基本化妝，衫褲多數係同一 colour tone 好明顯係襯過嘅，手甲脚甲多數都係做咗美甲或搽咗指甲油嘅，就算係上了年紀嘅女士落去散步都執得好靚架。
反觀香港就係落街求其粒件衫踢拖就算。以上講嘅對外表儀容嘅要求，好多香港人唔係日日做。
好啦，講番今日主題：美甲。
我以前係香港都玩過。我試過嘅係 gel 甲。
但係我份工要打字，做咗 gel 甲打字慢好很多，好唔方便 (除非你返工唔想做野啦！！我又見過，真係有人答我佢個 job 做得咁慢，係因為怕刮花佢的手甲！)
gel 甲係幾厚嘅，當你的指甲慢慢生長出嚟嘅時候，你一係就要耐唔耐去補(當然要比錢啦) ，或者好似我咁樣成日會手痕去刮走佢。
如果你返去美甲舖比錢去同你拆甲，佢係要打磨走的 gel (膠) 所以我試過幾次之後就發覺每次做完gel 甲之後，我的手指甲會薄咗，好容易斷甲 (當你用手指甲拔走釘書釘嘅時候特別明顯)
之後我就無再玩過 gel 甲，直至去咗美國，有個 walmxxt 同事成日有修甲，佢不停話做 shellac 好好，我一路都無上檔，直到啱啱八月屋企人嚟玩，成個月要不停週圍去，就決定去整一次啦。
明明記得係影低咗嘅，但係唔知張相 save 咗去邊，揾唔返，所以要 cut 呢張出嚟。
(題外：發覺呢部3叔電話 save 相好有問題，成日彈個 message 出嚟話我個 system time 要再 set 過，跟住係過相嘅時候就發覺有的相名 double 咗 [相名係日期時間 ] 。
仲有就係成日 detect 唔到我張咭，就自動 save 相係電話入面，但係我過相嘅時候就成日有相檔 broken, 即係一邊黑咗 load 唔到嘅。
唔知同電訊商有無關係？比大公司批價好的？因為以前用 verizxn 都係3叔機從來無問題，係轉咗 t-moxxl 之後嘅3叔機，兩部都有呢個問題)
好啦，又講番 gel 甲 同 shellac 分別 -↪
shellac / soft-gel / hard-gel 分別
以我自己試過嘅結論話你知，其實無乜大分別，都係將的有色嘅膠甲油搽上手指甲，照UV 燈嚟set 佢，不過就係搽幾多層嘅分別。
我做 gel 甲嗰時差唔多搽成5-6層，因為 gel 甲硬度高的，佢可以造埋延長手甲，咁手甲面積大咗，佢仲可以畫花，痴閃石等等
Shellac 甲就搽3層，的膠甲油無咁硬，薄的，不過好多顏色選擇，仲要睇版同真實色差唔大，同埋主要係話就咁浸洗甲水就可以卸甲 (不用打磨)
但係浸嘅洗甲水要100% 丙酮 acetone, 你鐘意嘅浸高濃度嘅醋都得，不過要浸耐的。
美甲舖嘅女生一定同你講無問題呀，唔會傷甲呀。
我嘅發現係：
呢隻左手好明顯睇到，
啱啱生出嚟嗰一半手甲係白白淨，又平又靚嘅。
但係前面嗰一半，就係又黄又唔平，
好似雲甲咁樣。
仲要係隻隻手指甲都係咁樣，
呢兩隻手指公更加睇到係中間突起咗咁樣。
(好似起波浪咁樣唔係平嘅)
所以我覺得呢的係做 gel 甲嘅後果。
右手就無咁明顯。
我做 shellac 係 7/26 到8月尾去拆，
我留意自己的指甲大約一個月生長 5mm
感覺係依家重新生過的健康嘅指甲出嚟。
係健康嘅指甲未完全生長替換之前，就搽番我的日常甲油冚冚佢。。。
曾經五顏六色 紅橙黄綠青藍紫都搽過嘅我，
依家淨係搽呢的色，我叫佢做老女人色，
就係搽咗好似無搽咁嘅。
無名指嗰色，係我最鐘意嘅，
係朋友10年前送比我架，每一次清甲油存貨，
呢支都係第一支留起，就快見低了，
係網上揾嚟揾去都揾唔番。
然後日前行街，不停咁試甲油想揾相近的顏色，
比我揾到尾指嗰支，竟然突然 cold feet 無買到，
到第二日再去好在仲係度
(睇均成個貨格得呢一支)
中指嗰支係用食指嗰色溝出嚟，但都係唔似。
會用食指嗰色同尾指再溝均睇吓似唔似。
