嚟美國之前，我係香港有參與一個業餘 (amateur)合唱團嘅。入團嗰時我24歲。
我個合唱團嘅“領導人”係行內好有背景勢力，所以我地個團每年有好多表演“機會”，即係依家嗰的揸支旗仔，阿霞姐派個飯盒請人去嗰的場合呢🤫🤫🤫
除咗呢的表演之外，我地團自己每年都攪演唱會，係文化中心唱架，係咪好威威呢！？第一次參加，梗係嘅開心又興奮呀！但係第二第三第四同以後嘅每一年，就愁囉！因為我地係要每人有quota咁去“賣”飛架！講明係業餘，去邊揾人嚟做座上客呢？咪每年都要攪盡腦汁，揾friend揾屋企人揾大中小學同學同事等等等‘受害者’🤣🤣🤣
嚟咗美國以為無得唱架喇，點知上年有一個緣份出現，令我係整整24年後（48歲）又再參加一個合唱團🥰
都係業餘嘅，但係好高質，指揮係真的指揮，彈琴係真的專業彈琴好勁的，而我地唱嘅，就係一班好鍾意唱歌嘅業餘人🤣🤣🤣我地每年一月開始練，五月第一個星期日係春季音樂會，之後暑假休息，到九月開始練，十二月第二個星期日有聖誕音樂會，全部免費！！！淨係門口有個“隨緣”嘅捐款箱，收到嘅錢都只係捐番比教會交電費（我地係教會練習）。
就係咁樣，唔洗再揾“受害人”。
嚟咗美國之後咁耐無唱過，本來無乜特別懷念，但係唱番之後，同團友好夾。上星期春季音樂會前幾日，收到肥鬼嗰妹電話，生活有變掛，以為唱埋今次又要搬屋（？）真係有想喊嘅感覺，先發現自己咁想念及喜愛唱合唱團。
=======
係香港乜都講錢嘅社會，以為呢的免費嘢係無可能的？
肥鬼個表姐，學生時代吹長笛的，去過歐洲巡迴表演架，現今60歲，仍然有参與一個業餘嘅樂團，一年有四個表演，都係免費的，隨緣捐款。
我都叫做曾經跟老所學彈琴，依家只係自己係屋企練。呢個團有好多曾經的專業樂手，成日係屋企自彈自奏都悶啦，有呢的業餘樂團，大家都可以切磋一吓，我地又有‘平’的音樂會，正！
No comments:
Post a Comment