今年今日 2020.5.26 震震震震

中共黑社會嘅兩會明明應該係3月開架，因為中共自己攪個武漢肺炎出嚟攪到要改期，就係所有舉手僵屍都集中埋同一個地方嗰陣，就發生地震。

唔想導人迷信，但係異象呢的野，信就有用，仲要三番四次咁發生，有無咁橋呀？？？

唔該，係真嘅就快的整死中共啦！！！

A/ 3月18日北京頤和園湖水潮上漲。

北京強風天氣在入夜後，京津冀數十處大火。

自1884年慈禧太后退居頤和園之後，至今共有三次潮漲。
1908年11月，慈禧死前約10日
1916年6月，袁世凱死前3日
1976年8月，毛雜東死前半個月

B/ 2019年12月12日 新疆3日同現
2020年2月14日 內蒙5日同現

C/ 2020年5月21日 下午3點天空突然變黑

今年今日 2020.5.24

雖然香港國安法殺到嚟，但係香港人咁鐘意買野，梗係人人都去 sogo 大減價。

香港人係自己屋入面大叫都就快要比黑警拉！

咁多香港人去行 sogo 黑警梗係又射催淚彈喇！仲要隨手行入便利店攞野飲，當正自己係日本皇軍。
中共話國安法排咗係5月28號會議上面，仲要等的僵屍舉手先叫通常，你呢個武警係今日就已經當咗呢到係香港直轄市？？？

不過夜晚 阿PK 就話佢已經後數比咗錢喎，你唔好話香港獨立之後先比？？？


==========

黑警製造大混亂，不如拉晒全香港700萬人坐監啦！

2020.5.24 6pm 紅隧 特登閘晒的車全港停駛

今年今日 2020.5.21 邊個驚的？

我諗尋日新聞一出，嚇親好多人，包括我自己。
雖然我地高叫"攬炒" 都有成年了，但到真係發生在眼前嘅一秒，還是會有一刻回不了神 (心理準備同現實發生的距離) ，更加可以肯定的，就係上年六月嘅革命直到今年，都只係預備賽。現在戲肉先至剛剛開始上映！

中共的全國兩會會議一向係3月舉行的，會期大約兩星期，不過，今年2020年因為武漢肺炎而改期。全國人大會議改到5月22日  及 全國政協會議 / 中國人民政治協商會議改到5月21日。

因為中共雜總要過好年導至武漢肺炎散播全球之後攪到世界大亂，想炸咗個地球而自己全身而退？唔好咁天真啦！所以依家中共都不能幸免，入面都攪到一鑊粥咁 L 樣。工廠無工開，無訂單，無外匯收入，之前一戴一露勁倒錢出街，中銀又買咗好多"原油寶" (布甸同中東玩油價減價戰，插水落到 -$34/一桶) 蝕到仆街，總之中共依家就係五行缺水就嚟死。

中共呢的黑社會政權係自己就快要死了嘅時候會點做？咪就係拉埋人地一齊去死囉！名符其實的攬炒。為咗可以即係吞晒香港庫房入面的錢比佢去吊命，佢依家完全唔會再理章法架啦！

講到野蠻粗爆嘅手段，真係希特拉都只係包尾，中共派阿琼去搶個立法會主席位返嚟過晒的大白象工程都唔夠快，依家直接加張紙話香港係我玩晒嘅。。。

話人地佔中攪到股票市場跳水？依家現實話你知，香港唔係你中共話吞就吞架！吞唔落隨時會變噎死架！！哈哈哈哈！！睇吓最終邊個整死邊個。

一話要吞香港，係你地的中共公司第一個插水，點解？的貪官嘅錢無得走啦！下一步，全部雙規的貪官，拉晒佢地，全部錢充公比党嚟吊命。就好似乾隆養肥咗和珅，然後比嘉慶攞嚟濟國，我地香港人比大陸㩒住嚟搶咁耐，養肥咗邊的人？咪就係的投共貪官商人nancy 廢老，依家共晒佢地的產囉，千祈唔好比佢地走呀，要一齊共享祖國繁榮！

============

成件事香港人要記住 777 柒婆之外，港奸頭號通輯犯，一定包埋呢兩個一級戰犯：

就係呢兩個一級戰犯，倡議小學雞雜總繞過立法會，直接將國安法塞落香港。律師的那個祖藉湖南，工賊會的福建來。

===============

香港出世，祖藉湖南，港大畢業做律師，之後做黃大仙區議員出身，及後由 689 提拔做嶺南校董，係2014年雨傘革命期間，代表旺角潮聯小巴申請禁制令清場，同鼠王芬兩個一齊係律師界別做滲透。

我自己有個陰謀論：689 同 777 背後嘅權派係唔同嘅，所以行事不配合，也互相睇唔起對方。689就淨係靠黑社會(小桃園飯局); 777 就覺得自己係讀書人好醒(年年考第一，政務官出嚟，無人夠佢叻) 。689 係好想攪到香港大亂，整死香港也無所謂，由2016 魚蛋革命係旺角街頭開槍，都係想比解放軍直接落嚟。我形容為武力生吞香港。

相反，'逃犯送中條例'有人話係柒婆懶醒咁提議比雜種嘅，就係做到係"紙"上面跟足法律做野，外國反對聲音相對就唔可以咁大聲，都係要生吞香港，不過都仲係擺係枱面，扮晒好文明咁樣用刀叉食囉。

今次書面提議人大攪香港國安法嘅八婆，係689 嗰邊嘅 (689比佢做嶺南校董；佢幫潮聯申請禁制令 - 潮聯背後旺角黑幫) 其實藍色陣營都分唔同路線，不過依家急在眉睫，屎急馬行田，只希望佢地咁樣就差錯腳，撻死！！！

今年今日 2020.5.20 食砒霜喇你！

叫得阿 Starry 搶個寶座番嚟都係想咁啫 - 要過乜就過乜。

你想要生吞香港，食砒霜喇你！

的 nancy 千祈唔好走佬呀，留係到享受祖國的愛，雜大的温暖。

我只希望依家真係進入最後大直路。。。

今年今日 2020.5.18 一場大龍鳳

2020.5.18

今日 Starry 李領導終於獨登寶座了。
其實洗乜咁勞師動眾啫，你話你係咪坐上去囉，又洗乜叫左手梁君高調宣布右手波仔主持會議，又再攪場投票大龍鳳話自己當選？係因為自己都知自己無任何正當性！

唔投你的反對派都比你抬晒出去啦！得番的舉手機器。
真係希特拉都要跟你學野呀！

成個立法會出面入面都係保安同警察，其實你地係入面係要有幾咁驚香港人呢？香港人無你 工聯會 6 7 暴動咁勁整土製波蘿架喎。。。

直接黑警治港仲慳水慳力啦，香港人唔會反抗架喎！一反抗大把和理非走出嚟話佢地攪亂香港呀，香港一定要穩定呀 blah blah blah 咁咪就做沉默的羔羊屠戮得更快囉！

The legislative council of Hong Kong is finally doomed on today 2020.5.18.
One country one system started today.

All these pro-china MP kick out all democract party then have a close door voting,  appointing one and each other to chair the meeting and to put Starry Lee up as the chairperson.

DNA

2020.5.18

呢段日子，睇好多書。
先前睇完一堆講邪教的書，同埋睇咗好多唔同嘅邪教記錄片，跟住睇嘅係講尋親嘅書。

依家網上有嗰的幫你追尋祖先資料嘅網站 (揾出世紙記錄，揾人口譜查記錄) ，仲有好多同你驗 DNA 嘅網站，整幾滴口水寄過去，等幾個月，就將你嘅 DNA 基因資料電郵比你。肥鬼都有玩，結果係大部份都唔意外嘅，得小部份結果係覺得好出奇。

佢嘅結果係超過50%係愛爾蘭，另外第二大百份比就係有英國/比利時/蘇格蘭，跟住好多零碎的百份比都係歐洲中部的國家，同埋每個人都會有大約1-2%嘅非洲DNA (已經有研究確定全世界人類都係嗰到發展出嚟嘅) 而出奇嘅地方，就係話佢有10%維京人 DNA (vikings)!!!!

基本上肥鬼個DNA資料同佢阿爸阿媽一路講比佢知嘅家族歷史都係吻合嘅 (原來咁樣好重要！) 。有其中一個祖母係比利時/德國邊界一個小鄉村長大嘅，自己鄉村比德國攻打咗，所以極度憎恨德國；另外就係肥鬼阿爸嗰邊係英國嚟嘅，因為佢成日(講笑) 話自己係同戴安娜係表兄妹 (因為佢地姓 史賓沙) ！另外又有一個近代的祖祖母係愛爾蘭嚟嘅，姓 Lamb 我地之前去愛爾蘭旅行嗰陣好想去一個舊地址睇吓，但因為唔係什麼旅遊景點(好荒蕪一個地方) ，我地又無租車，就無去到。

點解話有 10% 維京人 DNA 會好出奇？因為現有嘅資料無一個親人係北歐嚟嘅，咁呢10%係邊到走出嚟嘅呢！

肥鬼嘅 DNA 同睇尋親嘅書有乜關係呢？
由科學家發現咗人類ll基因排列開始，好多人嘅尋親故事就由完全無希望揾到，變成好有機會揾到，而且唔似得以前滴血認親咁樣，依家用 DNA 去揾親人，你係無得唔認的，事實(證據) 擺在眼前，避都無得避，問題就係出係呢到喇！

好多人係意外同親人失散了(例如戰亂) 咁揾得番嘅就梗係皆大歡喜啦！但係重有好多例子，係因為各種原因而放棄個小朋友，咁呢的小朋友大咗嗰時就一廂情願的想同血緣親友相認，但係其實對方係決意將往事放低，矛盾就係呢到出現了。

=======

第一個我可以講嘅真實例子，就係肥鬼阿爸。
六七十年代的軍人(肥鬼爸係越戰軍人) 每天都隨時有可能要死係戰場上，所以去到邊都有女朋友呢點絕對可以理解。
佢自己亦都坦白的講過，話知道有一位兒子，係駐某基地嘅時候出世的，跟住那位太太不願意跟佢搬去另一個州，久而久之就失去聯絡了。
(這樣的故事係呢邊問番咁上下年紀嘅人一的都唔出奇/特別，又越戰又韓戰，所有軍人都除時調動，如果隔一輪無消息了，好多都預計係唔會返到嚟架喇)
肥鬼個妹好想揾呢個阿哥，覺得點都好，同自己有血緣嘅，係生係死都想有個知字，咁佢就去 ancestry (祖宗) 網站嗰到揾啦，又比佢揾到。但結果係嗰位兒子同肥鬼爸兩個都無乜興趣相認(!!) 到依家都只係有限度的過時過節短訊問候，係咁多。
事隔一輪，有日肥鬼爸比張舊相肥鬼個妹睇，張相入面係肥鬼妹同一個小妹妹一齊影的，以肥鬼妹嘅記憶，就係佢地曾經幫相中小妹妹屋企裝木地板(肥鬼同佢阿爸細佬曾經一齊做木地板裝修公司) ，然後突然間肥鬼爸話"嗰個係你個妹" 意即屋主太太曾經都係肥鬼爸嘅女友？？！！

嗰刻肥鬼妹好嬲，嬲到講唔到野，隔一輪平伏心情諗住同佢傾究竟係乜野一回事，佢就老人痴呆上身乜都話唔記得(???)
依家攪到都唔知仲好唔好信佢講嘅野！有幾多可以信？仲有幾多無講？會唔會真係有人有日走上門話係親戚？呢件事係令到佢地三兄妹對阿爸嘅印象大打節扣，不是因為佢的過去，而係佢嘅唔坦白/唔老實。

========

係上面本書入面，係兩姊妹從少分開，年長的女兒比人領養，養父母當佢係自己親生一樣的好好栽培，佢仲成為了第一個打職業哥爾夫球的女性，養父母同好多人一樣，沒有話佢知領養的真相 (到佢發現時當然晴天霹靂，養母不能接受佢想尋親，曾經嬲咗佢好長一段日子) ；沒有比領養的那個妹，就係屋企受到阿爸阿媽虐待，悲慘的童年，兩個都唔知有對方的存在，不過就話由細到大都總覺得係有啲嘢遺失咗嘅感覺。

好喇，到大咗啦，打哥爾夫球嗰個想揾親生母親，先頭係揾到的親戚嘅，個係個個都講的唔講的，擺明有秘密咁樣，到最後揾到阿媽，上門見面，同佢傾兩句之後，親生母就快快打發佢走，後嚟先知係個妹就快放工返嚟，佢唔想比個細女知自己嘅秘密過去。

呢個打哥爾夫球嘅女最後都同個妹相認，但峰迴路轉最恐怖嘅係，其實成個家族入面個個都知呢個秘密。家族入面人人都知 (的所謂長輩個個都向呢對姊妹隱瞞) ，佢地阿媽以前係豪放女人，嗰個年代唔興避孕，所以有咗BB就會失踪一輪，然後將的BB比人收養，由親戚開始到街坊都有！所以有一個佢地一路以為係表姐的女仔，其實都係佢地"真"嘅姐姐，不過呢個表姐，就算比埋證據佢睇，佢都係不願面對咁樣嘅現實，仲叫以後唔好再揾佢！

點解成年人個個都不能面對自己嘅過去，係啱係錯，都應該 own up to it (坦然面對) 大話摀大話，只會傷害更多人。

===============

其實我人生第一個 DNA 個案係好傳奇的。
應該係2005年嘅事。嗰陣係做HR嘅，因為員工人數很多，成日都有千奇百怪嘅電話查詢。嗰日收到一個同事電話，通知我地佢明天會開記者招待會，咁我就了解吓佢點解要開記招啦！
佢話本來佢一家四口相安無事(父/母/佢/妹) 妹妹讀緊大學，咁啱讀到 DNA 呢樣野，就攞成家人的口水去驗吓，一驗就發現阿媽同阿哥嘅DNA竟然係無血緣關係的(!!!)
全家人極度驚訝，之後阿媽講個故事出嚟：
阿媽有咗 BB 嗰時好後生，男友(即後來阿爸) 唔想結婚，就諗住生出嚟拎去比人領養。
拎咗個 BB 去拎養機構之後幾日，阿爸阿媽回心轉意，決定結婚同埋返去領番自己個仔。
幾十年過去了，因為咁樣驗一驗 DNA 就發覺領養機構比錯 BB 佢呀！！！
幾十年眨眼就過去了，依家咁樣點收科？阿媽個心就梗係好想揾番個親生仔 (所以開記招想領養機構比的文件出嚟) 梗加係想追究責任啦！
但人係感情嘅動物，個仔會唔會從始同家人有隔膜？揾唔揾到都已經唔再重要，因為對呢家人感情嘅傷害已經造成。

===============

當你睇多幾本呢的書，就會發現呢的案例多如天上繁星，皆大歡喜的極少，大多都係傷心收場。
我睇完幾本書之後，有一日行 costco 係一堆書山前面考慮緊買邊本嗰陣，同隔離打書釘嘅女士搭訕，講講吓又講到佢都做咗 DNA 測試，之後揾到一個親人，結果又係唔想認，唔想有聯絡。

=========
細個嗰時未有 dna 呢樣野，一家人成日會講笑咁話 "你咁怪雞嘅，梗係係醫院到同人調亂咗你返嚟！" 嗰時我都會諗，如果真係唔係親生嘅，咁我會唔會去尋親呢？好在阿媽生得我比較求其，我係傾向唔會去尋親的！

=======
大家有機會去搜尋一吓，好多人將自己嘅尋親旅程放上網同人分享，好多都係傷心故事。

中式碗 / 西式碗

2020.5.17

又打爛野，所以想起呢個題目。
搬過嚟咁耐，對於一個有 OCD 嘅師奶嚟講，呢樣野係幾鬼苦惱嘅。
講緊就係碗。食飯用嗰隻碗。點解咁煩惱呢？

如果你一路都係香港生活，你係未必會留意呢樣野嘅！就係我地用開嘅碗係有脚嘅(?) 吓！唔信？睇吓。。。

好似上面呢隻櫻花碗，最下面嗰 2mm 就係我形容嘅脚。(呢隻係去日本餐廳食飯，咁啱接待處係一個小商店，見到就買咗兩隻)
如果你一路都用開咁樣嘅碗，係未必會覺呢樣野有乜特別嘅。我都係嚟咗呢邊之後先發覺，點解呢邊的碗總係無以前用嘅碗咁就手？

因為呢邊的碗係無脚的。

我係點樣發現呢樣野嘅呢？
因為我地食飯飲湯，係會拎起個碗埋嚟個咀邊，由其係飲湯嗰時，加上我地都鐘意襯熱飲湯，咁要拎起一碗熱湯嘅方法，就係手指公放上面碗邊同時食指中指就放碗脚下面

呢個時候你就會發覺嗰 2mm 嘅脚係幾咁有用 (隔熱) 。如果用上面藍色個碗飲湯，你一定要毛巾隔熱先可以捧起碗湯。不過佢地食野無我地咁熱架！！我地乜都鐘意襯熱食，由細訓練到大，所以食得好熱，佢地食開凍野，乜鬼野都要吹凍話辣咀，所以成日係我已經食完佢仲等緊！

點解我地用嘅碗會有咁嘅分別呢？因為西方飲食文化係唔會拎起件餐具架，全部都係用刀叉匙羹由枱面送到上咀邊；反而我地好多時係將食物放入個碗度，再張個碗放到咀邊，扒的餸入口咁樣食嘅。

另一樣唔就手嘅野，就係佢地的碗成日都係疊唔到上去嘅。

我地的碗係可以一隻一隻好整齊咁樣疊上去嘅，佢地嗰的就會左搖右擺。我嘅 OCD 就係呢到喇，以前唔多要做家務唔覺，依家自己做師奶，唔鐘意的野疊唔到，睇見好似周身唔聚財咁樣，哈哈哈

佢地嗰的碗係好似上圖咁樣，不能整齊疊起的。
同埋佢地係興一套一套咁買架，一套入面四件餐具(杯/主菜碟/前菜碟/湯碗，有時湯碗會換作朝早食麥片嗰碗) ，通常係一盒餐具2人/4人/6人套裝咁樣賣嘅，而我就一路都係散買，因為屋企從來未試過好認真的晚餐！通常都係碟頭餐，咁隻前菜碟係從來唔會用！

肥鬼媽係感恩節同聖誕節就會將佢家傳嗰套餐具拎出嚟用！
如果我講 buffet table 大家就會以為係去酒店食自助餐嗰張枱，其實呢邊的屋企，一個傳統飯廳，係會擺一個長方形櫃係一邊，同食飯枱咁高嘅，呢個就會叫做 buffet table 係多客人嘅晚餐時可以將餸放上面一列排開，每人攞的就埋位食，而呢個櫃入面就係收藏餐具的，通常中間個隔係玻璃門，比屋主展示最靚嗰套餐具。

呢套餐具通常係阿媽傳比阿女咁樣嘅。另一樣會傳落去嘅就係銀器 (不是首飾嗰的) 而係一個盒，入面係絨面的間隔，入面裝住全銀的刀叉匙羹等等。依家無乜家庭會有認真的晚餐，所以呢盒野都好少出場，因為全銀嘅關係，每次用完要即洗同最好即刻吹乾放番入盒，又因為唔常用，大個的湯杓要包保鮮紙如果唔係會氧化。。。

今年今日 2020.5.16 遭黑警私刑老翁判罪

事件回顧

2019.6.26
上水天平村事主醉酒與人爭執，警員到場調查期間，事主對警長揮拳，被捕到上水北區醫院治理。
當晚三名警員在病房對事主行私刑

2019.8.20
議員陪同事主兒子開記者招待會。兒子對於父親係醫院比警員毒打事件投訴接近兩個月，警方一直不受理無進展。立法會議員係記者會上播出三名警員對老翁行私刑的整個閉路電視錄影過程。

2019.8.21
因立法會議員播出的閉路電視錄影證據，三名警員被捕，並被控襲擊致造成身體傷害罪及串謀作上述罪行。

2019.12.12
三警今日再提堂，申請改控罪為公職人員行為失當及襲擊致造成身體傷害罪，三人毋須答辯獲准保釋。

2020.1.13
事主入稟區域法院，認為涉案警員施用不合法武力導致他受傷，違反《香港人權法案》保障市民免受酷刑對待的權利，就上述損失追討賠償，但沒有列出金額。

2020.5.16
事主承認普通襲擊及襲警罪，被判6個月監禁。

Nancies / Troll

2020.5.13

依家講 Troll 大家就會直接想到係網絡上挑釁的言論。
其實 Troll 本來係另一回事。同我咁上下年紀嘅人，以前都應該見過。呢個玩具曾經係香港都紅過。

Troll 係一個玩具叫巨魔娃娃 / 魔髮精靈。身體細細，特色係怒髮衝冠的造型同鮮豔顏色的頭髮。而 Troll 嘅本義係一個住喺山洞入面嘅小魔怪。

我先頭都完全唔記得呢個有玩具架，不過因為上年聖誕嗰時，肥鬼一個親戚的女兒想要一個 Troll 公仔做聖誕禮物，我去搜尋一吓先想起

但係其實今次唔係想講呢講玩具。
係真係想講 internet troll ...

話說我阿媽以前唔多玩電腦野嘅，佢最多就係係電腦到玩接龍同射波波個的遊戲過日晨。
跟住佢的孫開始大，要同佢地接軌所以佢都有"面書"不過係入面嘅朋友全部都係屋企人，跟住劇本走就係發現咗嗰的屋村懷舊頁再揾番的舊街坊。除此之外阿媽同其他老人家一樣，玩面書都只係分享吓飲飲食食或旅行相，但係上年2019香港革命開始咗之後，我發覺佢會多咗同人地鬥咀(!!!!!) 佢唔係簡單的係某一新聞下面留佢嘅評論留言，而係真的係嗰的新聞下面的評語，同嗰個三九唔識七嘅人，回覆嗰個人嘅評語，想要糾正佢嘅睇法！或者係反駁佢地睇法！！

我第一次睇到嗰時覺得好驚訝，因為可以話係未見過阿媽嘅呢一面，不過都唔係發生好多次就無理。

之後有一日發現阿媽有一個 post 入面有張相，佢係個 post 話麵包店個女員工，夾個飽比客人時個飽跌咗落地，佢夾起來照放入袋照賣比人。唔洗問阿貴都知張相就係麵包舖同女店員。
呢的公審 post 依家大家都好熟識啦。
不過見到阿媽都竟然會咁做，就真係證明咗"廢老"一詞嘅由來係有原因的。

然後事情發展更意想不到！
當你以為廢老一詞只係適用於香港嘅時候，你會發現原來其實係世界性的。

係武漢肺炎殺到嚟香港嗰陣，我訂咗的口罩寄去肥鬼媽屋企，再拜託肥鬼媽寄去香港 (加拿大呢邊係百無) 。嗰陣只係一月，武漢肺炎仲未殺到嚟呢邊。肥鬼媽同所有外國人一樣係唔信口罩嘅，梗加唔信呢個中共製造嘅武漢肺炎病毒啦。
佢嗰時嘅情形就同我自己阿媽一樣，個"面書"只係貓狗動物短片同旅遊相為主。

然後到咗3月，我發覺佢一樣又係不停"帝吧出征" 情況比我阿媽仲勁。呢邊嘅屋企人，個個有自己一套，最簡單嘅分別就係一家人入面有人係民主黨有人係共和黨，而我地住嘅密芝根州嘅州長，又有好多極具爭議性嘅抗疫措施，所有屋企人都有自己睇法，而肥鬼媽就走去週圍"發表"意見。

係面書嘅世界入面，我自己一路都有一個堅持，就係你有你睇法，我有我睇法，我唔會去你嗰到踩場，你都唔好嚟攪我，鐘意就睇，唔鐘意就唔好睇囉。

好在我的post好多係中文(所以逃難了) 但係我呢個第三者睇住佢不停去其他屋企人嘅面書post個到挑機真係慘不忍睹！！

我依家明白長輩圖呢樣野嘅重要性了。因為肥鬼媽去人地嗰 post 嗰到挑機，係連人地 forward 嘅嗰篇文都唔睇就發炮，即係淨係睇 headline 就算，完全就係廢老人版。

我地兩個對於咁樣野事情發展其實都幾驚訝。特別肥鬼媽以前係一個科學老師，本來好應該係事事講科學根據，但係佢依家變到電視講乜就信乜，同香港睇 cctbb 嘅廢老無分別，我地講咗好多次比佢聽，依家所有電視台都係有背後金主嘅操控不能盡信，但係次次見到佢都係攞電視野嚟爭論，真係好討厭。

我自己阿媽還好的，但係重視言論自由嘅美國人，肥鬼不能也不會評論佢阿媽的睇法同做法，所以結果係肥鬼好少打電話比佢阿媽。

希望呢個只係因為疫情關係，遲的可以放監之後佢會好啲啦！！！