送給守護這個家的你 2021.8.20 Friday

送給守護這個家的你

2021年8月20日星期五

尋日本來係想揾呢首歌嘅。

方皓玫 你是你本身的傳奇

送給呢幾個學生。悼念一個逝去的人都是罪。現在的香港。

想話呢，呢的咁嘅香港學店，讀完出嚟都影衰你個名呀。

依間野終於同夏威夷格林威治大學一撚樣齊名囉。唔識呢間野？梗係啦，得葛博士一個人畢業架嘛。

共產党將文革帶入校園2021又一杰作。

那個令你喊的人 2021.8.19 Thursday

那個令你喊的人

2021年8月19日星期四

今日早上陰天，依家晏晝開始有番的太陽，明天又嚟落雨了。

珍惜今日的陽光，出嚟露台坐吓。

原本揾緊一首歌，跟住揾吓揾吓，就睇到"東京愛的故事"主題曲。

小田和正 突然發生的愛情故事 1991年

簡直係出賣年齡系列。一講呢套戲，係人都會估到乜年代嘅人啦！哈哈哈

淨係首歌已經帶番好多回憶出嚟。

莉香選擇離開完治的一幕

同入面啲留言一樣，睇番呢一幕，我就喊了。

呢一幕令我諗番以前個男朋友。佢就係那個令我喊的人。

不是肥鬼。肥鬼從來都無令我喊過，就算我地初識時係異地戀人關係，肥鬼從來都無令我喊過，有的，都是掛念的 happy tears.

反而係之前個男友，就好似莉香同完治咁樣，二人中間有的，只係傷心。

啱啱睇緊本書入面有呢句說話 "A friendship based on emotion is shallow indeed. So don't be troubled by the trouble. "

依家諗番，以前男友給我的就係 emotional distress 反而係同肥鬼一齊，佢嘅強勁氣場，係比到我非常源源不絕堅實穩定的情緒。我深信佢嘅氣場係嚟自對主的堅實信念。

呢套1991年播嘅劇，嗰時我未拍過拖架，但係套戲就係好坦白咁話定你知，愛情路上，就係揀愛人 或 被愛；揀一個令你喊的人 或 一個令你笑的人！

>>>>>>>>>>>>>>>>>>>>>>>

究竟係邊年睇呢套戲就唔記得喇，不過肯定唔係初中。印象中係喺新屋嗰度煲呢套劇嘅 (因為係新屋先至有 VCD 機) 舊屋係七層行樓梯上落嘅屋邨，住晒一家六口，仲未有多餘錢買高級奢侈品家庭電器。

嗰時的翻版 VCD 唔似得依家有互關網，係無咁快手嘅，距離套劇真實播影日期，會有幾個月延遲。因為日劇係每星期播一集，一套劇11集都播成三個月，仲要做中文字幕。

好記得嗰時買翻版碟，係唔可以急，又唔可以慳架。如果你心急要睇好新嘅劇呢，佢個 VCD 好有可能係個人就咁拎住部錄影機對住個電視就咁錄嘅，會有手震，唔對焦，錄埋廣告，移咗位，同埋係後面有人講野！

唔可以慳係因為你買好平嗰的碟，好大機會一套劇入面有一集係壞碟，當你諗住用一個週未煲晒成套劇，然後煲到半夜三更發現中間第六集隻碟死咗，真係喊都無謂。

我重讀中五嗰年去咗美孚地利亞中學，其中一個女同學住葵芳，佢同我一樣係插班生入嚟重讀中五嘅，所以我成日放學就去佢屋企玩，跟住先識葵廣(葵涌廣場) 係日日放學都會行嘅學生聖地。初時主要係睇 sanrio 公仔野，hello kitty,  little twin star,  my melody,  大個啲之後就越嚟越少買呢的精品野，嘥錢又無乜用 (依家仲有好靚嘅 hello kitty 毛巾，無開過，得個睇字) 其餘就係睇時裝同髮飾 (如果話每個女人都有一個死穴，咁髮飾就係我嘅死穴，見到好靚髮夾就買，但係嚟嚟去去都只係用大大條橡筋扎頭髮！)

之後睇住葵廣地面嗰層變成翻版碟集中地。

由1991 東京愛的故事 到 1993年 同一屋檐下 到 1996年 悠長假期 Long Vacation / 美味關係 同埋1997年戀愛世紀 Love Generation 經過日劇熱潮之後，韓劇就急起直追，藍色生死戀，冬日戀歌，然後就沒有然後了，香港的電視變咗只係播外國劇，日劇韓劇台劇之後就係清一色大陸野，仲要係清一色宫庭劇，就算係韓劇嗰的都好快厭惡了，唔係絕症，就係窮人嫁有錢人系列。。。

反枱 2021.8.18 Wednesday

反枱

2021年8月18日星期三

利申：我唔係加拿大人。不過咁啱因工作嚟到呢到，仲有幾年先會返歸，可以話係中長期市民，至少，我有進貢稅收，呢個省嘅購物稅係全加拿大最高的 15%

尋日係呢個省選省長嘅日子。

>>>>>>>>>>>>>>>>>>>>>>

我地未搬嚟之前係住喺 Michigan (密芝根州) 嗰到同加拿大 Ontario 安大略省相鄰，肥鬼就係接壤的地方做野，每日好多人兩邊來回，佢地就係過嚟美國 shopping 嘅人。唔係去買名牌，係真的每星期過嚟超市買餸買日常用品食物的人，佢地計過度過，就算加埋油錢過嚟買，都仲平過係加拿大嘅物價，因為 Michigan 州稅只係6%

另一樣常見的就係"病人" 不是武漢肺炎的，係所有要做手術的長期病患，因為係加拿大排期排到死都未排到 (咁熟口面嘅！) ，所以令願比錢過嚟美國去醫病！！我上次返香港同朋友傾計，佢老婆照吓嗰子宮，發現有的事，係政府醫院都要排5年，後尾自己用保險比錢去私院攪算數。

呢兩點就係一個香港殖民地長大嘅人，去到真切體會乜野叫 socialism 同 capitalism 嘅現實案例。

嗰的加拿大人仲要洋洋自得咁話 "我地過嚟美國買野係助長你經濟！" 呢句係咪好熟面口呀！！！

(i.e. 無咗我地大陸人落嚟買野，你香港市死咗喇！) 

事實係你有讀過經濟科最基本，需求上升demand⬆⬆直接後果就係價格上升 price⬆⬆

即係你自己國家打重你稅，都提供唔到足夠醫療，然後你過嚟買晒我地的貨物令到我地物價標升。

呢的都係左膠社會主義者唔會話比你知嘅事實。你可以唔信我見到的案例。所以我再比多個事實你知，我地2016年嚟咗咁耐，都揾唔到家庭醫生。正確嚟講，應該係話我地十幾個同事及家人都揾唔到醫生架，佢地有要事就返美國約見自己家庭醫生算數。

上面幅圖，就係今次省長選舉其中一個候選人，佢政綱嘅第一點就講到，事實係呢個省仲有 69,000 個人等緊家庭醫生。

呢個省人口只係 約 925,000 但係 69,000 人( 7%)  人無家庭醫生

1/3 人口係中老年齡層 ( 45-70歲 ) 

係美國長大嘅肥鬼，嚟到呢到之後有一日傷風，去診所睇醫生。因為覺得有喉嚨發炎，想攞的消炎藥 (antibiotic) 。

一入到去診所，我就覺得返咗香港咁樣！好親切！攞籌！等叫名！等咗成個鍾因為診所 full house 然後唔夠3分鍾出番嚟，醫生話你未夠嚴重到死，唔會寫紙比你去攞消炎藥，你自己去買 over the counter 成藥或返屋企瞓覺瞓到好啦！ 

經過4年，終於安排了一個執業護士比我地，佢係介付護士同醫生之間嘅一個急就將解決問題方法，即係佢嘅學歷係護士以上嘅，但係又未去到醫生嗰水平，可以開的普通高血壓或傷風感冒藥比你，但係有大病都係要等見真醫生。

咁呢個執業護士因為係第一次見面，都想全面咁睇睇肥鬼係乜料，就寫紙話想睇睇肥鬼的血啦 (抽血) 仲有腰同盆骨位 (x-ray)

首先，肥鬼係美國嗰的醫生，已經差唔多全部用 MRI 診斷，如果 MRI 係睇得清楚啲，點解仲睇 x-ray 呢？(就咁係電腦搜尋一吓，買一部 MRI 機最平USD$15萬{舊機番新} 至一百萬{新機包按裝})

算喇，係到做過客就唔好多事，唔好咁多辯駁。嗰朝一早去到醫院，真係同返香港無分別，人頭涌涌，排隊，攞籌，幾十條隊，嗰的阿嬸拎住的 file 行嚟行去，排完抽血又去排 x-ray 同我係香港跟阿爸阿媽去公立醫院覆診一。模。一。樣。

係邪惡美帝長大嘅肥鬼，係從來未見過呢的大場面，佢咁大個人睇醫生嘅經歷就係預約，準時去到，叫名入去，因為係"真"家庭醫生，會問候吓阿爸阿媽各人，傾吓計，跟住先真正開始睇病。如果係緊急小病(傷風感冒喉嚨痛) 通常話比護士知佢都會盡快攝你入去的。

以上淨係我地係醫療方面的體會，仲未計其他本土市民衣，食，住，行，讀書，就業，做生意，居住問題 (的屋價/租屋價格貴到飛起) 。

曾經有朋友問我呢到係咪無大學(所以無醫生)?  其實呢到係有成10間大學，每年都有人畢業做醫生架。

但係呢個省比唔起錢養咁多醫生 (省政府控制醫生數目及收費價格) ，所以執業醫生數目一路下降；而且就算比你讀完8年做到醫生，呢到省政府嚴格控制醫生收費及應診時間，所以呢到畢業嘅醫生好快就去晒加拿大西邊啲大城市揾食。

呢到過往8年，都係 liberal (自由派) 執政，尋日，佢地大敗。

新執政黨叫 Progressive Conservative 勝選的省長好刻意咁話自己個黨同 Conservative 係唔一樣嘅！我未有再做詳細搜查，唔知佢地真正分別係邊？唔知佢點解要咁刻意講呢樣野。(左膠洗腦令好多人錯誤的深信保守派就係恐同歧視移民！)

但係我想話呢，呢到得嗰一千零一份(比左膠操控) 的報紙/電視，都只係話"省長落選原因係佢個選舉活動太趕了，未能將佢同的選民連結" 一個執政黨堅離地去到上咗太空，仲要唔肯面對自己做錯嘅地方，真係無得救！

呢個選舉結果，間接證明我之前講嘅情形，就係電視上"造"比你睇嘅世界，同現實世界係完全兩回事。

睇電視網上，你會"以為"保守的人死晒了 (但係我落街遇到好幾個鄰居都係清醒保守的人) ，全世界都係得番的左膠，你係唯一死淨種，你只可以接受政府對你嘅操控，今日係打針，聽日又打針，為咗保護你嘅安全，你要係屋企坐監，你必須要有電話裝置，入面有晒你所有記錄，監控你所有起居飲食，然後就係要有猶太人的行街紙先可以出街，去到要逼你打針唔係就炒咗你，乜你仲覺得自己同大陸社會計分制很遙遠嗎？

Liberal (自由派) 呢個名真係好好聽，但佢地同自由一的關係都無，佢地係大政府主義者，乜野都係政府管治，你交咗的稅之後，連你想點樣用的錢嘅自由都無。

Libertirant (自由主義者) 先至係自由至上嘅無政府 (小政府管治) 主義。

會唔會係大家一路都攪錯呢兩樣野？

我都好明白呢個省係一個退休省，好多人係西岸嗰邊大城市打足一世工，之後就攞筆退休金過嚟呢邊養老，人口老化嘅省想要個政府照顧佢地呢個出發點係無可口非，問題係人口老化嘅省，收緊全國最高嘅稅金，然後連最基本醫療都交唔到功課 (呢個自由派落選省長其中一個政綱係要將醫療預算再減$3M) 究竟佢係競選活動離地？ 定係佢一路都只係為政黨服務？

花 2021.8.11 Wednesday

花

2021年8月11日星期三

近年係屋企多咗玩插花。唔係高級花藝嗰的，係普通買扎花番嚟插係花樽到，得個睇字咁樣。

以前係 Michigan (密芝根) 嗰時，覺得嘥錢所以係無插花嘅。

不過嗰時係獨立屋，我有個花園種咗好多花，仲有個 sunroom (3面大窗的偏廳) 我又種咗好多盆栽。依家呢到又住番低密度住宅，得個露台，所以先會插花。係灰色的落雪 / 落雨天，有一扎靚靚嘅花係枱頭望住，可以比自己感覺到世界還是色彩繽紛的。

唔係什麼貴價花，通常都係超級市場門口時令的花或最平的花，我就買嗰樣囉。

早前春天三四月嗰時，就最多鬱金香 (tulip) 因為 PEI (Prince Edward Island 愛得華皇子島) 係盛產鬱金香嘅，$8/12支，特價時會有$10/18支，不過鬱金香通常開到尾佢會耷晒頭，所以唔係插得好耐。

第二鍾意就係呢個 繡球花，最鍾意藍色。

藍色繡球花襯白色水仙百合

藍色繡球花 (hydrangea) 配後面白色水仙百合花。

另一款我最常插嘅就係水仙百合花，因為平，係 Costco $12/10支，呢款花好襟插，慢慢開花，唔會耷頭，花型可以維持好耐。我留意到佢係星期日返貨嘅，咁我通常就較啱時間星期日早上去買，可以插到差唔多兩星期。

Costco 係批貨價超級市場，所有日常用品都係以上倉式的數量去售賣 (例如一大包的厠紙共48卷) 我同肥鬼呢的2人家庭，只須要一個月去入貨一次，仲要好多時係為咗買花先走一轉，唔係的話兩個月先去一次都得。

第二最愛牡丹，同繡球花一樣排第二，因為牡丹好香，但係牡丹無粉藍色，如果可以將佢地合拼咁就最好喇！

粉紅牡丹 (peony)  配粉紅水仙百合

不過，我自己最。最。最。鍾意嘅係白色有香味嘅花，所以每年我都好期待農夫市場開檔。

我呢個省嘅中部全都係農地，上面揸車落嚟約1.5 - 2小時，每年暑假，有個農夫會係星期四至星期日，11am-5pm 揸架小貨車落嚟開檔，所有蔬果都係新鮮嗰朝摘嘅。

所以每年暑假我都會幫襯佢買菜，唔去超市，一嚟超市係有上架費，我不如直接比錢農夫好過，二嚟超級市場上貨幾快，都唔會新鮮得過佢朝早採摘然後開車落嚟。

呢個農夫佢有一個花農供貨，每年的百合好壯，又平，因為我每星期都買，佢賣$2/支比我，最主要係佢有白色有香味嘅百合，馥郁芳香。

呢張相入面，有兩種百合。

顏色鮮豔深紅色嗰款係無香味嘅；反而係百色攣葉嗰個係勁香。

上星期出去買花，同另一位顧客一齊傾計，幫襯咗農夫成兩年了，係一個友善和藹的人。話題不能避免又講到武漢肺炎，然後又講到政府控制，然後農夫竟然講出"共產主義如果執行得好係好嘢嚟嘅" 

我同鄰居的眼球都跌咗出嚟！

我唔係第一次聽到呢個荒謬嘅理論，好耐以前已經睇過一的文章講左膠點解洗腦，其中一樣係將共產極權浪漫化，所有比共產主義催毀嘅國家只因佢地沒能將"真"共產主義實行出嚟 (係 實施 execution 上出問題，而不是共產主義 這個偉大嘅思想的問題) 睇文章發現洗腦左膠，同現兜兜有個真實的人係你 (一個經歷緊共產殘害的香港人) 面前講呢個大言不慚嘅理論，真係點到你唔信左膠滲透係幾咁恐怖。

最諷刺嘅係佢嘗試解釋佢個睇法，話佢自己都係喺歷史入面揾答案，然後就講佢自己幾憎納粹希特拉，然後佢睇唔到希特拉都係靠左去上位的， national socialism,  幾乎每個我接觸過的左膠，都係好驚恐右邊然後不自覺自己去晒極左。

白色百合花，個花瓣邊係攣攣哋嘅，佢個香味勁過所有室內空氣清新劑。就算嗰日無乜風，的香味都會一陣陣咁樣飄埋嚟！

上兩星期有粉紅色百合。

上星期有黃色橙色百合。

香港文革 2021.8.10 Tuesday

香港文革

2021年8月10日星期二

讀會計嘅楊潤雄點解可以掌管教育局？共產党最叻揾廢柴做領導 (切爾諾貝爾核電廠領導係賣鞋sales) 自己兩個細路就係澳洲讀書，所以係香港攪文革入校園就毫不留手呀。

先前開始將教師逐個擊破，邊個出頭就除牌邊個出聲就告上法庭，然後又夾埋姓穆忠誠廢物，去開一檔"教聯"然後就對教協開火，逼到你跪低。

點解話共產党已經嚟到美國？ 依家係美國左膠州份加國會左膠當道，強推 CRT 就係將文革帶入校園，同依家香港教聯 (共產党攪嘅) 強推雜種主義入學校一樣。

佢依家鏟走教協，即係以後每間學校入面，個個都要為咗份工跪低。你唔跟隊教共產洗腦，佢咪批鬥你，將你炒魷。

你地其實知唔知左膠洗腦去到一個乜野程度？

依家呢到嘅課程，係一定要教你嘅小朋友，性別不是男或女，仲有男的但係想做女，或相反，5歲就教佢肛交。係美國，教師係入教師工會嘅，好多人洗腦覺得工會就係為教師爭取福利 (但係幾十年嚟教師專業係出晒名低人工 -> 乜都爭取唔到) 但係教師工會係比 demoncrat 由上至下全面滲透，所以強推呢的課程。係網上有好多家長去 school board (校委) 會議，痛批唔可以教呢的課程，但係嗰的教師入晒工會，必須跟隊。你有獨立思想的教師，就會被批鬥，將你整走。同香港一模一樣。

>>>>>>>>>>>>>>>>>>>

下面係早前5月嗰陣，見到出面嗰海有的浮波。

然後有一日朝早，聽到"噗噗噗噗"有船駛到好近岸，出去裝吓。

藍天白雲配黃色船好搶眼。

水手用長棍撩起個浮波。

原來浮波下面有個籠。

捉新鮮龍蝦。

駛去下一個浮波。