語言大混集 (2007 10 27)

呢D相係阿肥鬼佬上一次嚟香港見我屋企人嘅時候影嘅...
因為佢無假，只係嚟咗短短的五天精華遊．．




你地都見到，淨係我屋企人都咁大堆頭(連Do Do姐都嚟埋！！！！)，其他日子，梗係更強勁啦．．．．各路人馬（我的各方好友們）全都向我報名要攞個期，所以係短短的五日，我地差不多係日日都見客，不停食食食同飲飲飲




呢張就係阿羅豆D同外星人第一次見面，因為佢發覺外星人好恐怖．．．“點解佢D．．D．．．D頭髮同我地唔同顏色嘅？？？”咁阿羅爸爸叫佢摸吓啦，佢都驚到手腳都縮埋．．．

咁係嗰幾日入面，我做得最多嘅野，除咗介紹，咪就係翻譯囉．．．





其實當時的我，三文兩語真係無問題的，真正的問題反而係當你身邊都坐滿人，七咀八舌的好興奮咁有好多野想問，然後阿肥鬼佬又好eager快啲答佢地嘅問題，又有好多野想補充，咁啲廣東話同英文不停衝擊你的左右耳朵





最後的結果係，我不停對住屋企人講英文，然後對住鬼佬講廣東話．．．仲要唔發覺，直至佢地眼定定望住我，然後一齊爆笑．．．

其實最最攪笑的，反而係，當我係個邊嘅時候，我成日係sofa睇電視瞓著覺，就係迷迷糊糊之間，我就會說夢話，仲要係講廣東話，佢不停問我講什麼，我就不停講廣東話

陳宅優良傳統 (2007 10 17)

我的屋企，由細到大都好鬼熱鬧，除咗因為我有四兄弟姊妹之外，係我地四個都大咗之後，仲不停咁，有我地的表弟妹到來，簡直係“前有古人、後有來者”，點解？？？

皆因我地嘅"陳媽子"係湊BB能手，所以，差不多所有阿姨/姨丈/舅舅的子女，都係"陳媽子"湊大的，數吓先：早期有舅舅的張小兄弟(間唔中暫托式)，然後有阿姨的朱BB，另一個阿姨的尹BB，阿哥的陳四根，同埋家姐嘅羅豆D(現在式的)...

啲細路，住得遠嗰啲，就平日住係我地屋企，週末先返屋企；住得近嗰啲，就日頭係我地屋企，夜晚阿姨/姨丈來用飯完畢先一齊返屋企，所以基本上，我家成日都好多人、好多小朋友、好熱鬧．．．

咁點解的小孩會駱驛不絕咁嚟"陳媽子"屋企呢？？？

第一，梗係因為我地四個咁乖嘅人版啦．．(雖不至於個個大學畢業，但至少都係正常人吖)

第二，其實係因為我屋企有個優良傳統，係咩呢？就係我屋企，係每個小朋友開學之後，就一定要晚上7點鐘關上電視，大人小朋友都冇得睇，(所以宜家咁多番時間寫blog囉)，星期五夜晚呢，可以夜啲啲咁多：7點半喇；星期六呢，簡直係放監咁樣啦，哈哈哈，但星期日呢，又變番一樣喇，因為第二日又要返學．．．

咁冇得睇電視，又係到做乜呢？？？雖然阿陳肥爹同阿陳媽子，都無接受過高等教育，但身教方面確係勁，係夜晚呢段時間，大家只可以食飯、溫習、看書、看報紙，然後睡覺就係咁樣。係陳宅，從來無缺乏嘅野，除咗愛心同埋米飯之外，就係報紙同書，係高峰時期，我屋企一日最多有成三份報紙俾我地睇，吸收時事常識，世界新聞．．．

我曾經問過陳肥爹：“你唔怕我地淨係睇娛樂版嘅咩？？？？”

點知佢話：“唉！驚都未驚過，佢日日都無得睇電視咁悶，睇吓睇吓，睇完娛樂版無其他野做，自自然然，越來越大，就會睇埋其他時事常識，世界新聞咁架啦！啲細路，個個都有樣學樣，你日日係度睇書睇報紙，佢就會學你架啦！！”

就係咁樣，培養出我們個個都好似好有文化氣息咁

下面呢，就係阿豆D未開始返幼稚園之前嘅，嗰時，我地仲有夢幻的晚間電視看，但我同阿豆D，就係度玩選"美麗小姐"，哈哈個個細路都係咁玩架，攞張被嚟做晚裝哈哈，首先，由後台(電視嗰邊)開始行出嚟．．．






行行行行行行過嚟鏡頭前面．．．．哈哈




再擺番個靚post先．．．






跟住發覺，都唔好玩嘅，情況開始失控．．．．






開始除咗件晚裝佢先．．．






但好快，我地就覺得咁樣唔好玩，變咗扮"鴉烏婆"，咁仲好玩喇．．．









跟住仲變圭埋玩飛氈添




其實，唔睇電視都只係幫助，最主要，都係要同個小朋友玩，一齊做一啲野，遊戲，睇書．．．．呢啲都係宜家所謂嘅親子活動囉．．．．