走運了!!!! (2007 11 29)

很久很久沒有惹上大傷風，今次一病，足足有一個星期之多，對我來說是走運了．．．但一時大意，見媽子同肥爹都無事就無帶到口罩，攪到羅豆尋日發燒無得返學（心痛死豆媽了）

今次一病，在上星期二放了一天病假，在看了兩次醫生都唔好的情形下，今個星期一再看了第三次醫生，再放了一日的病假，終於有了起息．．個起息是．．

家中的羅豆D，平常多數唔同我玩嘅，常常掛在口邊都說“我唔要阿姨”“我唔要茵茵姨媽”．．．“我唔要同阿姨玩”．．

在家中待多了或會走運，走運了的原因就是，羅豆D發現有人會同佢玩飛行棋．．．會陪佢睇Maisy（係VCD嚟嘅，佢成日睇，番睇了不下數百次）．．．會陪佢食茶點．．．






所以佢就好開心，一早起身就走嚟叫我起身，要一齊食早餐，要一齊刷牙，最好就同佢一齊返學（咁梗係唔得啦，我早過佢返學好多．．）所以，退而求其次，佢就叫我要放工要跑返屋企囉．．．當你話佢知“我要去返工啦，我要先走啦”，佢就會話“唔得，我唔要你返工！！！”






有一晚，

豆媽：“羅豆，好夜啦，好去刷牙瞓覺囉喎”

羅豆：“我好掛住阿姨，我要同阿姨玩”

豆媽：“你好掛住阿姨呀？但係第日阿姨唔返嚟呢度瞓架喎？！？！”

羅豆：“阿姨去邊度呀？？我唔要阿姨去第度．．．”

豆媽：“阿姨第日去咗Uncle Jim個度咪唔返嚟呢度囉，你問吓阿姨幾時返嚟探你？？？”

羅豆：“阿姨你幾時先返嚟探我呀？？”

我：“唔．．．我惗呀．．　365日啦，365日就返嚟探你啦．．”

羅豆：即刻走去個月曆個度望，然後就走返嚟“無365日架喎，係咪星期一就返嚟探我？？？？”

唔怪之得豆媽有時收工夜咗，都會搭的士返嚟．．．因為有個人仔係屋企話好排住你，等緊你返去同佢玩，真係收工行都行得快啲．．．

我的童軍生活 (2007 11 27)

事到如今，我諗，都係時候介紹我最後一方面的另類生活 - 我的童軍生活，喔！差點忘了，是男童軍，不是女童軍．．．

好多人聽到我“原來”是一路都有參與童軍活動（特別係男童軍），都非常驚訝？！？！

點解呢？我都唔係好明，所以我曾經問過其中一個朋友（係佢個下巴終於合番埋之後．．），佢嘅答案係：係我身上的幾樣活動的組合都好奇怪，一啲都唔統一：無諗過一個唱合唱團的文靜女仔，竟然又會係讀一科好social的酒店系；一個好自由的作息不定的人（因為係酒店要輪班工作），又會玩一啲高度講求紀律的童軍活動，仲要係一個女仔去玩男童軍，最後就係混合咗一個“我”出嚟．．．　哈哈！！！

本來，係中學嘅時候，我的第一個出乎意料之外嘅課外活動係學『柔道』，都唔弱架，學到三級 - 白、黃、橙、綠、藍、啡、黑，我考到【橙帶】，都免強可以應付一啲小混混嘅，其實都係多得崔露芳師傅好有耐性咁教我，同咁易容俾我合格哈哈！！

後來，見家姐玩女童軍玩到可以去日本交流，就吸引咗我嘅注意。

可惜，同家姐細佬一齊讀同一間中學嘅唔好，就係佢實在太勁，俾到一啲現在所謂的壓力俾我，再加上，負責女童軍那位老師好似好鍚我家姐咁樣，（其實，都只不過係驚玩得無佢咁叻，會好瘀唶！！！）所以就冇參加中學的女童軍。

但係，一般學校入面，全部都係齋團，即是通常都只係得男童軍團（俾男同學玩）同女童軍團（俾女同學玩），咁，唔玩得女童軍嘅我，咪無得玩？？？

後來，從家姐同學口中，先俾我知道咗，原來一啲公開旅團（例如：社區中心的旅團）會係男女團的，但係我知道嘅時候就已經係中四，為免影響會考，所以我等到中五會考後先去玩，最後好可惜：為時已晚，我已經超齡啦．．．最後唯有賴叻咁樣扮勁去做教練員，即係黃Bar囉？？？教練？？完全無底子都去做教練？？係吖，因為係教幼童軍之麻

其實，童軍訓練係好有制度的，我地有訓練手冊去跟進童軍的進度，而且我地啲教練員都係有課程去上的，咁我咪邊學邊教囉．．．而且幼童軍學的都只是日常生活的技能，教導小朋友學習獨立，最主要係因為對象係7-12歲的小朋友，所以，都會係從遊戲中學習，咁講到玩，我梗係叻啦．．．

＝＝＝＝below abstract from Hong Kong Scout Association幼童軍支部

幼童軍生活多姿多采，在幼童軍領袖的領導下，透過野外活動、認識社區、嘉年華會等歡愉的活動，一起從遊戲及小組中學習童軍及生活技能，關懷及幫助別人，培養責任感，發展潛能和創造力，以促進7歲半至12歲之少年身心及精神之陶冶與啟發，貫徹整個童軍運動年限的連續性訓練計劃，達到幼童軍支部的宗旨。

幼童軍支部設有活動徽章及進度性獎章。成員只要能學會或持續發展一種技能或興趣，便可考取一枚活動徽章；而每完成一個進度性獎章的全部課程，便可獲頒一枚進度獎章。進度性獎章共有3個，分別是幼童軍獎章、幼童軍歷奇章及幼童軍高級歷奇章。最高榮譽是個人挑戰章─金紫荊獎章。

=================

嗱，我啱啱開始教童軍嘅時候，就係帶呢啲“豆丁”去camp咁囉．．．好攪笑架，又怕鬼，又怕泥，又怕虫，乜鬼都怕一餐，成日依嘩鬼叫．．．






呢張相入面的“兄弟”（雖然有個女的"容姨"，但佢都當自己係男仔頭架），依家個個都高大威猛，但係十年前，佢地個個都係小學雞，係我教嘅第一代幼童軍（好在宜家走埋一齊無人覺唶）現在佢地個個都獨當一面，係佢地自己嘅人生舞台，發光發熱，最開心嘅係，佢地都成為我地嘅童軍第二梯隊，個個都繼續係度做領袖，教童軍，延續這使命．．．






哇，呢張相就係最好嘅證明，我係會去camp架，唔懶架．．．哈哈，反而我啲深資童軍就懶囉，得嗰一個出現．．．

（點睇得出？？紅帽就係深資童軍，綠帽就係童軍，所以前面三個係深資童軍，後面兩行就係童軍；而我同右面個Madam就肩部有顏色帶，即代表我地係有軍階，中間夾住嗰個就係細路，哈哈）






最後一定要介紹嘅：深資童軍三巨頭，

左邊係我地現在嘅老頂“容姨”佢宜家係我地深資童軍團團長；中間係我，深資童軍團副團長；右邊係帶我出身嘅阿Sir“大食怪”，都係深資童軍團副團長

唔講你地唔知，“容姨”係我同阿“大食怪”Sir一齊陪育出嚟的童軍第二梯隊，見到佢地宜家接手的頭頭是道，真係有點老懷安慰嘅感覺．．．

有益身心的活動 (4) (2007.11.25)

開估啦！！

哇！哇！哇！咪就係有人（洋人！！又係洋人）係度玩滑翔降傘囉．．．

其實係上一個山頭，我地一見到有人玩，仲要係一見到的時候，那個人已經係飛緊出去，我地即刻興奮起來，不停哇哇大叫，跟住就奔走過去了，但唔夠幾秒，第一個滑翔降傘人就已經降落咗係石澳左灘．．．

到我地奔走過來的時候，就見到呢幫人係度set up緊，你咪話要跑落去幾步再要跳出個斜坡嚟飛出去，淨係好似佢地咁樣，企落個斜坡度，我都已經腳軟了．．．你睇吓，真係行出少少就可以碌落去咁樣架喎






點解我會話係我為她們帶來好運呢？？？因為，美麗的景致，同滑翔降傘表演，係易拎佢地上次行山的時候係無架．．．好悶，齋行，係今次帶埋我嚟就有囉．．

哈哈，同埋咁樣嘅情形唔係第一次架啦．．．上年我同易拎同合唱團一齊去韓國比賽（共五天）－在第二天清晨，有兩個團員出去睇日出，但因為大霧，什麼都看不到，第三天清晨，我同易拎出去睇日出，睇到一個又圓又大又靚的日出，但係到咗第四天清晨，其他團員見我地講的日出景致咁美麗，佢地又去啦，點知都係大霧，什麼都看不到．．．淨係可以睇我地D相囉．．．哈哈

你睇吓我肥爹睇滑翔降傘表演睇得幾興奮．．．哈哈






同一時間，係前一點的山頭，呢個黃色的滑翔降傘人就好似已經準備就緒








拿起背包，就．．．






飛啊！一飛沖天去，一飛沖天去，小小穿梭機．．．









依家咁樣睇我地呢D連環圖，係咪好好睇呢？？？

但係其實，呢個黃色滑翔降傘人，佢set 好咗個降傘之後，其實佢坐在係個度起碼成半個鐘至九個字．．．等乜？？？咪就係等風囉．．．

唉！計我話，玩呢個滑翔降傘的人都唔係好醒目，我就唔會玩啦．．．行上嚟咁辛苦，要成粒幾兩粒鐘．．．但係就唔夠幾秒就咁飄咗落去．．．唉，嘥晒的腳骨力．．．






快活的時光，過得特別快，我地又係時候由巔峰回落至平凡．．．呢條就係我地歸去的道路喇．．．






就在回家的路上，我地發現咗，原來香港除咗有鑽石山呢個寶山之外，仲有另一個．．．因為係落山的路上，在路兩旁的草堆下面，撥開面頭的泥土，就會發覺全部都係呢種“寶石”！！！哈哈，今次真係收穫豐富






仲俾我發現兩隻石獅子？？？






大家見唔見我的老頑童肥爹係度揮手？？？？






＝＝後記＝＝

今次的遊記，真係要多謝易拎 - 個電話，因為，懶惰的我，又再次因為貪睡而忘了為DC差電（每次都在睡夢中叫自己要起身差著電先去睡，每次都就這樣睡著了），在上山時還說著要關掉DC好留下電量等我上去到巔峰再影，可惜，惡夢再臨，我還是在最重要的時刻斷電