20250930 今早8點的日出
嚟美國之前，我喺馬會做過。
嚟美國之後，依家就係哥爾夫球場做兼職。
同樣見證住一代文化的衰落。
===============
我94年開始係馬會做，同依家社會一樣，係水尾。
嗰時將軍剛走無耐，嗰logo剛轉（連個皇冠都俾人搣埋），我有幸係高級廂房嗰邊做過，仲可以見到舊一派的上等人/馬主/練馬師/騎師，出手闊綽是當然的，最主要係對人仍然會互相尊重，對侍應生都會有禮貌，係大嘅宴會場合，在流程上嘅誤差，都係可以同佢講道理解釋嘅。
好快，呢批人少了。
換來了另一批非常 show off （炫耀）的人，我都唔知佢係度炫耀啲乜？又唔係特别有錢，又唔係出名，又無學識，唔識英文，唔識廣東話，不過特別鍾意呼喝侍應，落單叫食物飲品，好鍾意有刁鑽的order，咁樣嚟顯示自己好特別，小小事就大吵大鬧，喜愛投訴，點解知佢無錢？當你見過五大家族嗰個level咁你會發現呢啲都只係魚毛，仲有佢地真係chur到小小事都叫經理要void單囉。
嗰時年輕的我，剛出來投身社會工作，入世未深，覺得呢的暴發户就已經係最乞人憎；直到現在的我，真係唔敢想像，如果依家係香港，要serve呢種人會係點L樣嘅一個景象？？
仲要呢堆人，同打機一樣，怪獸都會升呢（升level)，佢地已經唔再係一般的暴發户，佢地係紅二代，黑二代，富二代，個個都係有背景有關係有組織咁樣幫共產党洗黑錢，八九十年代的暴發户，係拎住6-7位數字的身家恃勢凌人，依家呢啲怪獸，閒閒地都有十幾廿個數字的身家，嗰種横蠻無理，應該去到天堂級别。
==============
到依家做哥爾夫球場。
來到美國早期，好多時都同肥鬼 + 肥鬼媽或朋友一齊去打golf，如果附近有大型賽事，也會去入場觀看。睇得多，對呢個運動有一定理解。
肥鬼係由細玩到大嘅，佢會解釋比我聽，哥爾夫呢個係一個gentlemen sports，唔係話淨係有錢人先會玩，而係參與呢個運動嘅，都會尊重呢個運動尊重自己，呢個運動頗多（不成文）規定，仲要好多規定係要求大家自約咁去遵守紀律（講到呢點你明點解gone are the days 啦？！）。
例如，上身係一定要著有領嘅polo恤，一定要著長褲（你見PGA入面全部都仲係）著golf鞋，要預先book tee time，也要準時，至少要15-30分鐘前到櫃枱check in；咁啱遇著其他人準備揮杆時要安靜；每個洞只玩一球（不是任玩3/4/5球）；每個tee time是四人計的，有多人的要book下個tee time，少過的四人的就要同其他人一齊玩；通常一般球場有18洞，分第一個9洞與第二個9洞，正常係預你2小時玩完9洞（最多2個半小時），球手有責任按時完成，不可玩太慢，因為每十分鐘，下一洞的人就來了；如果你book咗18洞，係9洞與10洞之間，你可以入去球會買個熱狗+飲品，去個厠所就繼續，不是入去食個lunch再出嚟玩。。。等等等等，好多好多，最重要（都廢事講的）--＞
golf 係自己計分的運動，呢邊係講建基於honest上嘅trust，所以你話你一杆入洞，都係入嚟填個表格就信你架喇（雖然係無獎的）但係對某些DNA建基於偷呃拐騙的人，就。。。明就明，唔明就黎明喇。
咁呢個運動依家係點樣文化沒落？
衣著越見隨便，T恤，短褲crocs鞋，呢的都算；
打得慢，比後面啲人投訴，仲要惡人先告狀；
為鼓勵年輕人玩golf，在黃昏時段青少年特價，有個阿爸跟埋嚟話‘只係睇仔’，然後比人投訴佢個個洞都“一齊玩”；
球會寫明不准外帶食物入來（你自己係出面食三文治我都算喇）在第九洞之後帶哂lunch bag飯團入嚟，用我地餐具紙巾，仲要叫我比杯免費冰水比佢，食足30分鐘lunch再斯斯然出去cut 番入去人地條隊；
球會門口每日寫住當天日落時間，黃昏時段的booking係特價的，因為無論你玩到第幾洞，日落時間就係the end，我地數住幾多球車未歸還，仲有人賴死唔走，響埋警報（好似龍捲風警報咁大聲的）都唔出現，要我地開車出去捉人！
上面講的呢個係一個gentleman sports嘅主旨，就係你會自律自重，唔會做的會比人鬧嘅野。而我每日目睹的文化沒落，同以前實在差太遠了。
再講一個現實的貼身例子 - 錢和小費。
這邊出街用餐要比小費是常識吧？我都知球會這裡只是一個小食部的規格，所以你也不用比15%小費，我期求的只是積小成多的小費，每個交易打賞壹蚊半蚊，特别係order咗要煮食的交易，最低人格的要求-壹蚊也不是貪心？
我試過有一日，一蚊都無不突止，我係要去office再攞一筒新散銀出嚟用，即係當日所有交易，的人係連零頭的散銀都一個不留拎走哂！
點解咁記得，因為嗰日係一個中產社區聯校學生與家長打球日，全日沒有零錢打賞之餘，就係不停的來要求免費冰水，免費飲料補給，不停order複雜的食物，例如熱狗的包有無gluten free呀？你個漢堡包係咪organic 架？最勁抽一個呀媽，問我炸雞塊個醬係咪homemade sauce??
你會唔會去茶餐廳點咖啡，問佢係咪 homemade macchiato？？
你會唔會去金拱門，問佢的茄汁係咪homemade呀？
我當然明白，小費係隨心的，有高有低，而嗰個聯校打球日，已經係第二年，往積如一；對比起晨早的一班老年球手，實在係天淵之别。老年球手係同一班人，過往幾十年，風雨不改每個星期日最早的tee time，身上一定有cash，知道呢個世界沒有免費午餐，我比佢一杯免費冰水會放低一蚊比我。呢個就係個分別。
=≈=========
.jpg)
