你來？我來？ 20250411

呢的相，係我2023年10月返香港嗰時嘅。

話咁快年半就過去了。

近來很多去了海外的香港人，都返香港旅行。

係FB同YT見到不停洗版食雲吞麵、食南記、食譚仔、食牛腩麵、食壽司、去飲茶食食食食食。

我有印象睇番早年返香港旅行啲YT片（或再早期的yahoo blog)，仲會有好多爆買嘅情形，因為係外國生活過，一返香港（因著滙率對算）就覺得乜嘢都平咗好多，買日常家品喇，買零食啦；又有因為外國無 fashion （？）要買時裝衫褲鞋襪，總之就係買買買買買。

但係依家連香港物價都貴了，就好似得番食嘢同埋食嘢。

=====

錯重點的題外話（1）。我係點樣感覺物價貴咗呢？

係美國，曾經US$100係會有一大架手推車裝滿嘅超市食用品；依家，半架細嘅手推車就可以唔見成舊水。

而係香港，曾幾何時我去櫃員機㩒錢，係每次幾百蚊咁㩒嘅，幾張紅衫魚打散做廿蚊紙咁樣洗。然後，有一次返去（2009年？），係一次㩒幾張500出嚟洗；再對上嗰次，係㩒一大疊500蚊紙，然後chur一聲咁就無咗喇，都唔知洗咗去邊，又唔見買咗的乜嘢。

最有印象係同阿媽去荃灣街市買餸，因為我返咗嚟就買多啲啲，叫做有多幾樣餸夾吓咁樣，有啲海鮮有啲斬料，咁就兩張金牛！都無幾袋餸，全部輕飄飄的！

我明明記得細個住屋邨7樓，過時過節，我同細佬要落樓幫阿媽手拎啲餸上去，講緊係好L重好多袋，拎到死死吓，都只係洗咗幾張紅衫魚🙄🙄🙄

=======

去番正題。

其實我今日主旨都唔係要討論返香港做啲乜！對於我嚟講，返嚟目的只有一個就係陪吓阿爸阿媽同見其他親人朋友。

我反而想講嘅係，喺嗰的 YT 片同 FB post 嘅 comment 入面，好多都係“多啲返嚟呀”，“快啲再返嚟啦” 很多很多呢啲comment😮‍💨😮‍💨😮‍💨😮‍💨

先頭，我以為淨係得我自己有呢個感覺，所以我收埋係心入面。

直到我喺加拿大住嗰幾年，會同肥鬼同事啲太太們聯誼，其中一個係澳洲來的，當時佢地有3個8歲以下小朋友。

有次小聚佢話要一拖三返澳洲探親🙄🙄🙄，由加拿大飛澳洲連轉機隨時要成30至40個鐘，仲要機票又一大筆錢，我地聽到都覺得辛苦，跟信佢就指住我，話我應該最明白佢嘅狀況，😞😞😞😞就係啲人永遠只會叫你多啲返嚟啦！而唔會諗其實佢地都可以過嚟啫？！

登！登！登！登！登！💡💡💡💡💡

我嗰刻真係同呢位K太太腦電波連接上了。

原來唔係淨係得我咁諗架！

我自己來美國的早年，大概係隔年返去嘅。

利申：呢篇唔係投訴，只係有感而發。

特別係我嘅屋企人，在我同肥鬼結婚時全部都飛過來了，這一點，我係非常感恩的❤️

嗰時我自己都有份兼職做吓，所以你問我，自己一張機票係咪好貴，又好似唔係嘅。但結咗婚，旅行探親大都倆個一齊架啦，仲有住宿交通呢？加埋晒又唔係平架喎！

仲有就係唔通次次旅行都係去香港？我要探親同旅遊中間攞個平行，所以都試過幾次［一星期香港+一星期亞洲國家］。

因為我同肥鬼無小朋友，所以大家朋友都覺得“奉旨”係我地返嚟？？就算成日同佢地講話可以嚟我地屋企住，都係永遠無人嚟架。

以為係一家有大有細嘅唔方便咁遠啦！但係的無細路嘅，什或係單身嘅都唔嚟架喎！

然後以為佢地覺得太遠？定係唔想講英文？

但係近年我見的朋友都會去澳洲、意大利，但仍然無人嚟呢度！！

依家多咗香港人係外地，會唔會多啲人有這樣的感覺？或者係過多幾年你地先會明。

點解話呢篇唔係投訴，因為我已經過咗嗰個階段，你唔嚟就算喇，可能朋友的緣份到此為止。依家我同肥鬼都好少出門，幾年下來，我地對旅遊的熱情燃燒盡了。機票是越來越貴，個座位只係越來越逼，行李越來越細，航班時間越來越長（無晒的直航 要你兜圈）唔見行李，無數取消延遲，為乜？

就係去買？去食？去睇世界上某地方的一個風景？

為咗睇嗰一個風景嘅代價就是上述咁多的勞累，算喇，唔睇亦唔覺得自己錯失咗的乜嘢！

唔係話永遠唔返香港，亦唔係永遠唔旅行，随緣啦，或者突然間會對世界某地方有興趣，排除萬難也要去呢！

====

又題外話（2）

上面呢張相，相信所有搭過飛機嘅人都影過同親眼見過。

咁你係信地平的？還是地圓的？

我自己對呢個問題是 no comment 的。

也無從 comment 呀！我不是科學家，對理科知識零慨念。就算我有很多很多知識，呢條問題仍然會係，窮一生也不會揾到肯定答案的。

我只能告訴你，用我自己的直覺和眼見的（如上圖），我“覺得”是地平的。可能我咁樣講都會招來很多人話我痴線？？

我很配服嗰的“真”科學家，不停去揾證據支持自己嘅理倫；我唔支持的，是強逼别人相信佢嘅理論的人。

人類係好奇怪的動物。每件事都要有個答案，心入面藏著少少懸疑就會好似蟻咬咁不自在，死都要硬塞一個答案入去（專家話咁就咁囉），跟住case close。

其實到依家，我地同1500年或1600年無乜分別呀，就係無一個人可以比到100%肯定嘅答案呀。佢極其量只可以話，根據佢揾到的資料“覺得”地球係圓/平的。

好多好多一般大眾反駁話地球是圓的，第一句就係“攪錯呀，你無睇過太空人影地球嘅相咩”？？

我想話，你又無做咗太空人飛上去親眼睇過，你都只係信“嗰個機構”的“專家”講嘅嘢；但係，同時間所有搭過飛機嘅人，見到嘅都係上面張相，但的人仍然唔信自己雙眼見到的，“選擇”相信專家答案。

你唔覺得呢點好奇怪嗎？

Be curious, my friend.

Be open minded to each and every possibility.

有啲嘢，係真係窮我地一生都唔會有答案架。

我寧願無答案，都唔要錯的答案。

新客仔 20250410

今朝起身又變番一片雪地。

早餐時段，有呢個常客。

係度食花生。

因為我買咗啲太陽花籽，所以呢個客仔就出現喇。有時都會見到佢成粒花生外賣。

Tufted Titmouse

佢嘅突徵包括頭上面嗰一束毛髮

翼下邊有小小金黃色毛

如果係太陽花籽，佢會“堂食”，廢是走嚟走去，佢會啄起粒太陽花籽，跳去旁邊櫈底下面，噒完粒籽又跳出嚟啄第二粒。

哈！見到我影緊佢🤣🤣🤣

到下午，草地的雪溶咗，跟住又開始落雪。

然後呢班大軍殺到。

本來沙丘鶴係到下午茶，但係火雞大軍一到，敵眾我寡嘅形勢，佢即刻走夾唔唞。

呢到應該有幾個家庭一齊出行，至少有兩三隻公的。

前面呢隻身形大的係公，後面細size嘅係雞乸。

哇，睇落至少重一倍！！

又嚟 20250410

 半夜三更，又開始落雪。

一陣間就已經舖滿一層雪。

唔似要停咁款。

呢位朋友知道天氣不似預期，所以一早就走出嚟晚餐。

呢位朋友遲咗，所以要係草地揾花生零食。

手工 20250410

🫠又是上世紀發生的事。🤪🤪🤪

因為肥鬼工作關係要搬去加拿大生活嗰幾年（2016-2022），我無做嘢正式投身家庭煮婦🤗行烈，因為時間多了，至令我人到中年，成就解鎖兩樣意想不到的東西。

========

今日講第一樣。

嗰時由美國間獨立屋，搬番去住樓上式住宅，有啲家具要賣出去再揾返啲啱大細的。在二手市場上溜覽，發現美國同加拿大啲梳化或櫈嘅款式非常不同。

係美國呢邊的梳化，係好boxy的，大咕𠱸的，個座位好深的，就係可以成個人攤上去，隨時可以打横小睡咁樣嘅。

類似呢的。行入去上萬呎的傢俱舖，九成九都係萬變不離其中嘅呢的款，就傢顏色唔同囉！

基本一模一樣的款，就係三座位或兩座位，有的L形的，有U形的。

另外一款美國常見的，就係一張可以成個人窩落去，將椅背較低同時將腳托上嚟的recliner （背躺櫈？）

上面呢張係手動式的，櫈右邊呢條木棍向後較就可以將腳托上來，同時向後挨就可平躺小睡。

啡色呢張櫈係電動的，右邊兩個製一個調較椅背一個調較腳托。

===========

老實講，呢的櫈係好舒服嘅🤪，睇電視嗰陣將腳托上嚟，冬天嗰時，冚張被，將椅背較低就可午睡😴。

但係，都好老實講🤔（我自己覺得）佢地真係無乜美感可言🫣你可以話佢平實，唔會過期（因為從來無追上過朝流😁）。佢地全部都好bulky大大件（好多美國嘢都係咁），個廳無成千呎咁上下大，随時擺咗櫈就無路行🙄仲要呢的係好personal‘’私人化‘’的櫈，即係我地屋企我同肥鬼各自有一張櫈，然後仲要有三座位梳化比客人坐，同埋一張小小咖啡茶機，就係成個廳的擺設。

======

離題

我搬來美國前，肥鬼屋企只有一張三座位大梳化。

到我搬嚟之後，我地行過好幾間傢俱舖頭，差唔多張張都去坐吓，然後佢買咗一張背躺椅（我多數坐梳化），之後返嚟唔夠一個月，佢話張櫈坐得唔。舒。服。

跟住呢張櫈，就變成我的第一張（也是唯一一張）背躺櫈，搬咗四次屋，我都一直用到依家（共16年），而佢呢？就已經換第五張背躺櫈。由手動的，到電動的，再到電動四節調較的（頸、背、腰、腳，共四個制獨立調較每部位）依家又坐番原始手動的！

唔知佢係骨格精奇定乜鬼嘢，第一張呢，就話人地個腳托入面的棉塞得唔夠滿，佢feel到入面打横條鐵（咁咪幾好囉，幫小腿按摩血液循環😆），之後第二張呢，就話個頭部軟墊入面太多棉！！佢將個頭挨晒落去都覺得條頸有向前點‘’鍾‘’的感覺，攪到條頸好酸軟。之後又有一張，就係話躺平嗰時，個櫈入面嘅彈弓成日想將佢摺埋！！佢要好大力用腳撐住然後大力向後挨落去。總知就是千奇百怪而又可以形容到比你知嘅，好細微嘅瑕疵！

不過後來我轉念想想，呢張櫈，佢真係一年365日，日日至少坐8個鐘（減去返工8小時，瞓覺8小時）可以話係使用量第二高的傢俱（電視機第一？）如果咁樣都要慳錢，咁辛苦揾錢又有乜意思呢？

==========

上面講我有好多時間，係加拿大啲網上二手市場溜覽，發現咗好多舊款嘅櫈，原來以前的凳咁靚架😍😍線條，布藝，風格，形狀全部都好靚。

跟住開始去研究一吓，原來的櫈，唔同形狀唔同款有唔同名稱架。

就係咁樣，可能嗰時成日係fb search櫈，就碌咗佢的資料出嚟。原來係我住嗰頭附近，有一位女士，自己係屋企幫人番新啲舊梳化同櫈(re-upholstery)。呢個係佢嘅職業 - 專業修復舊櫈，佢嗰個年代，大學仍然有好多藍領的學系（有一技之長的學系）佢讀完梳化及櫈的歷史、建造及維修，就係自己屋企開展呢個小生意直到現在，後來佢仲進修讀埋fine art master藝術碩士，令佢可以係布藝的花紋或顏色同室內装修的配合比到專業意見俾客人。

我揾到佢嗰時，佢開始舉辦小教室無耐。

你揾張舊櫈，send張相比佢睇吓，佢會話你知張櫈係適合初中高班，唔同的入門程度，最易的有半日小教室可完成一張最簡單的櫈。

呢張就係我跟老師用一日時間翻新的櫈。

我上面呢張櫈，要做的部份有椅背，椅墊同兩邊扶手，用咗一日就完成。呢張櫈，係我網上二手買返嚟（$20），上手都係諗住做番新小勞作，所以佢已經將木嘅部分的油漆洗走，同埋佢已經將椅背拆咗（跟住佢就無心機整，賣咗比我😆），我就將椅墊拆埋，就咁拎個木架（frame)去老師嗰度，揀選布料，老師就1對1教我點整（咁啱嗰日無其他學生）初班的教室有時係1對3的。

上面呢張係一張普通的扶手櫈armchair，下面呢張都係armchair但係你睇到塊布，係刺繡出嚟嘅一幅畫，所以下面呢張個名叫 Vintage French Louis XV Style Dancing Lady tapestry Nailhead armchair (nailhead 就係喺扶手嘅邊有窩釘）

==========

之後我好有興趣研究啲櫈。

越多研究，我越發現，自己係鍾情有扶手嘅櫈（arm chair) 😆無扶手嘅櫈視覺上🥸就係覺得無咗兩雙手咁囉！就硬係無咗的嘢咁囉！

另一樣就係我鍾意座得好低嘅櫈，大約距離地面5吋-8吋咁上下，所以我係網上見到附近鄰居賣呢張櫈，我就二話不說去買了。

修復‘’後‘’相。呢張係老師完成的，因為嗰時已經係2020年，小教室都暫停了。

呢張櫈嗰名堂，係19世紀（1880年）的 Howard and Sons open armchair (見到扶手同座椅中間通窿），deep seated 座位深 square back 正方形椅背 button back 就係椅背有五粒拉線凹位。

賣家話張櫈係佢嘅曾祖留下來的，同依家啲屋嘅現代裝修唔襯，擺咗係車房好耐無再用，廢是阻埞所以決定賣鬼咗佢無眼睇。呢張櫈已經超過100年歷史，超級重，好好木水，真材實料。入面塞嘅，啱係海棉係稻草。因為係超過100年的vintage古物，可以重用的填充物，老師係一定會返用，稻草嘅好處，係唔會好似海棉咁樣好快會坐扁咗，但係修復手工一定要好好，將一層薄的棉舖係稻草上面包住晒佢地，要用手不停熨順表面，唔好比的稻草咭出嚟。

本來的布料就係呢個花

呢幾張櫈應該都係咁上下時期，嗰時興嘅布藝就係呢個花紋。

呢張扶手同座椅中間個窿都包埋佢，

睇到同我上面嗰張open armchair嘅分別。

呢張櫈嘅布料同我張櫈嘅本來面目好似。

========

跟住我又揾到呢張 wingback chair （椅背左右兩塊翼）呢張櫈，同初班嗰張比，修復只係難少少，我係想自己做的，但係2020等到2022年小教室仲係暫停，所以最後搬番美國之前叫老師緊急幫我做（嗰時佢啲生意排期至少半年）

≈=======

最後仲有一張，網上揾的，一拼搬埋返嚟，要睇吓係呢到揾唔揾到小教室。

呢個款叫 Sam Moore barrel top channel back， 修復呢張櫈嘅難度，係個椅背嗰度，係要一塊布過咁樣逐條管車出嚟，再逐條管咁樣去塞啲填充物，然後好平均咁樣左右對稱的装上個椅背。

我呢邊係有舊櫈翻新修復的手匠，不過唔見有開小教室，我想揾的老師父，學多啲櫈嘅歷史。

嗰時如果再住耐啲，我係想揾一張settee ，settee係咁樣嘅：彎腳，curve嘅椅背，裝飾木雕刻，通常係兩座位（loveseat) 同梳化嘅分別就係無咁多填充物，即係你係要優雅有舉止咁樣坐嘅🤣🤣。不過，同上面的梳化對比，係美感方面真係高下立見。可惜嗰時無揾到啱心水的，我架玩具車又裝唔落咁大張櫈，所以我依家係好好珍惜我上面呢幾張櫈，日日都周圍坐晒佢地🤣🤣