今年今日 2019.4.28

反送中大遊行

因為要將陳同佳送去台灣審而攪出嚟嘅"送中條例" 依家就睇的人會唔會醒？？
簡單嚟講就係大陸唔洗再用洗頭艇啦，以後要拉乜人返大陸都可以用送中條例塔你返去。
究竟呢個世界有幾多人相信大陸的陽光施法。

梅香咸魚

講真嘅。
當年我真係帶咗條咸魚過嚟架。

係合唱團好朋友買比我嘅。
就係去到沙頭角都撞到嗰個！
佢仲好好心咁樣，叫海味舖老闆抽真空咁包幾次，確保唔會走味 (不敢想像成喼衫都咸魚味！)
我諗佢自己一定好鐘意食咸魚，所以覺得離鄉別井最懷念嘅食物會係咸魚所以覺得要買條比我！

而我又真係不負眾望，將佢帶埋過嚟。

結果？

係兩年前我徹底改變了飲食習慣，連飯煲都束之高閣，個條咸魚就一路都無離開過那食物架 (我兩次搬屋都有帶埋佢架！) ，所以最後我丟了。

今日竟然想起那咸魚。

因為。。。

呢舊芝士。

平時我係食 brie / camembert 嘅，嗰日見到呢舊特價又買嚟試吓啦。

二個字 - 梅香咸魚！！！！
哈哈哈哈

其實食入口嘅咸味係得好少嘅，柔軟度都 ok 架(我自己唔鐘意好硬身嗰種芝士) 所以不要誤會，完全不是難食，不過就係嗰氣味，完全就係梅香咸魚味！！！

所以如果你都鐘意(懷念) 梅香咸魚，可以去揾呢舊芝士嚟試吓。

時機 2

講開時機。

早前睇到有單新聞 -
2019.4.8
Turkey take flight crashes into motorcylist

係我另一個家鄉，有電單車騎士與迎面飛來的火雞撞上了，跟住失控撞欄，死咗。

係香港揸車，最多就係遇上強國嚟嘅撞車黨，但係呢邊，撞動物嘅機會率係極高的。

我學揸車嗰時最多人比我嘅告誡，就係在高速公路遇上動物一定要鎮定，一的大隻身型的鹿，嗰撞擊力對細車好大。另外再北的嘅州份，係會遇上 moose 大麋鹿 佢地嘅身型同隻馬有得揮，撞到佢地真係除時兩敗俱傷架。

呢兩張相係 2017 年另一單，好彩呢個家庭係揸車，不過成30磅嘅火雞，係可以飛撞到入咗擋風玻璃。。。

Family-Crashes-Wild-Turkey-Lodged-Windshield-Glass-Indiana

原來，上天要收番你條命，真係好多意想不到的方法。
這樣的時機都給你遇上，仲有乜好講。

襟用

係現今呢個世代，一件物品要用幾耐先為之"襟用"呢？究竟要用到幾殘幾舊，先可以毫無緣念，毫無'內疚感'咁樣丢咗佢？

我比自己嘅答案係 10年。

10年呢個界定，係估計自己如果有70歲命，咁都係用咗7個啫，仲係'個'位數，尚且可接受嘅感覺。

(btw 一般科學家成日諗點樣可以長命啲，我係相反的，屬於嫌命長嗰類，我覺得70歲就好夠了)

因為人大咗，學識了愛惜物資，先至會想要每件物品用盡佢，以前細個梗係無呢回事喇 (樣樣嘢都要跟得上潮流) ！依家先發覺，能夠將一件物件用盡先至丢棄，係對自己嘅一個 accomplishment  (修為 / 成就) 唔單止呢件物件嚟到世上功得完滿，而係自己都對地球無遺憾嘅感覺。

再抽遠的 (玄的)  咁講，佛偈入面話每個人都係罪孽深重，同聖經入面話每個人都係 sinful 嘅，係某程度上對地球嚟講係啱架。

你有無試過未用盡一樣嘢就掉咗佢？肯定有，一支筆一張紙，全都係用地球資源造嘅。

你為地球製造咗乜野？無。

人的一生，由出世到死，都係係到享用地球資源。

就算係一棵樹都比人類有用 (樹吸入二氧化碳，呼出氧氣)

不是要做道德撚去導人迷信，只係如果大家都可以 humble 的咁樣去生活，地球可能會多活幾年，所以唯有就係，從依家開始去惜物。

呢張相係上年抵達愛爾蘭第一日影嘅。成世人未試過咁長嘅'旅程'所以一屋嘅喼都出齊。

❄❄❄❄❄

上圖左手邊黑色嗰喼同灰色嗰喼都係愛爾蘭返嚟之後丟了。

兩個喼都係肥鬼嘅，黑色大嘅呢嗰喼，肯定超過10年，因為2006佢嚟香港旅行都係呢隻喼，仲好有可能係20年以上，因為佢話無印象自己用過第二個喼，其實我仲係好唔捨得丢咗佢架，下面睇吓佢嘅內籠就知點解。

係 "大西洋" 牌嘅喼，個 logo 係一隻海馬。

外面呢個拉鍊袋左右有風琴摺位。

依家嗰的全部都無。

 

揭開蓋有大網袋同索帶，

加頂部一個扣可以吊一套西裝或外套或長褸嗰類

再嚟一個 flip (間隔頁) 

有索帶可以放大頸巾或細 size 嘅披。

睇真的，呢個間隔頁係有扣係上面固定嘅，

咁樣係呢個間隔頁同個蓋中間嘅空間呢到，

放的大 size 嘅畫/相都唔會移位。

呢個間隔頁嘅背面又嚟兩隔網袋。

肥鬼每次都可以將底褲放大網袋，

厠所用品就放細網袋。

跟住先到呢個喼嘅主要空位。

我唔想掉呢個喼嘅原因，就係依家我行均晒所有賣喼嘅地方，就算係成三舊水嘅 "三辛嚟" 都係無呢的間隔嘅。只係得個殼，最齊全嘅都只係一邊網袋同另一邊有兩條索帶，其他乜都無架喇。

依家的得個殼嘅喼，最大問題係 pack 完之後棟企起個喼，入面的野會聚晒落底，會走位會移晒位。

勁無奈終於要掉咗呢個喼嘅原因，係呢個喼條拉鍊死咗，佢有兩個拉鍊扣，可以拉左或拉右，其中一邊"甩咗啞" 已經有一段日子了 (我都唔死心繼續用！) 成日都拉同一邊，再加上因為太舊了，佢個喼開始變型，咁拉鍊去到的角位開始要好小心咁拉埋佢(唔係就會爆拉鍊) ，今次返嚟係好驚佢捱唔到，會係運輸帶嗰到爆喼咁大鑊，所以真係要放棄佢了。

♘♘♘♘

至於前面灰色(好明顯有撻漬) 呢個就係舅父係酒店執返嚟嘅，人地掉得就梗係有原因啦，執返嚟嗰時係殘舊嘅，的角位開始披口，但係無穿無爛嘅，肥鬼用咗佢8年，依家又係一邊拉鍊壞咗，仲要拉鍊個手拉都甩埋，要穿過萬字夾去頂檔，而且個角位又爆口，今次返嚟呢兩個喼都唔敢擺貴重野呀，淨係擺的舊衫入去，爆咗或比人偷野都無咁傷麻。

↔↔↔↔

係上面相睇到，左手邊後面紅色嗰喼係我架，2008年用到依家，無穿無爛仲用得嘅，但問題係呢個喼係得兩個碌嘅，仲要係30吋大喼，裝滿時拖到我手殘，所以今次返香港，就捐鬼咗佢。

右手邊後面淺灰藍色嗰硬喼係我架，依家無人用硬喼架喇！呢個又係朋友換新野二手比我嘅，成15年喇，今次因為去愛爾蘭幾個月，發覺呢個喼裝好多野之餘，所有玻璃野用衫包實放入硬喼，都仲係最好辦法。

仲有一個 carry-on 嘅喼，又係舅父執番嚟嘅，2008年跟埋我過嚟架，用到嗰底板都爛埋，又係今次返香港丢咗佢。

哈哈，咁多個喼，得右邊黑色個 carry-on 可以留底。其餘都係今次係香港跟我返嚟架。

點樣拎咁多個喼返嚟？

喼中喼咁樣囉！多得香港物價騰飛，都無乜野覺得好抵一定要買，所以兩個大喼都無過磅架。

用咗成個月係香港格價，行匀港九新界，所有行李喼開倉都去過了。當然，好多都係言過其實嘅，一入到去問吓全場最平嘅喼都要599... 就咁行番出嚟。

因為我自己鐘意軟喼，所以都唔係好多選擇。

最後買嘅紅色(左後) 30吋 4個碌大喼，係新浦崗樓上舖 HK$300 呢個真係最抵架喇。

然後係右邊的兩個 "pirre卡單" 係返香港第一個禮拜，就係葵芳新都會 / 大窩口熊貓 / 荃灣廣場 都見到做緊旅行喼展銷 

HK$699/兩個 (細喼19吋 + 中喼24吋) 或 HK$799/兩個 (中喼24吋 + 大喼30吋) 

呢個組合價真係最最最抵買嘅價錢，因為好多好多地方，就算細喼都要 $399 / $499 但因為我係一個 cheap 精，睇到最後一星期嘅時候，比我發現佢有個28吋但係甩咗色嘅賣淨蔗，再加上我晚上8pm 去到，阿姐想做埋單生意趕收工，㩒兩吓計數機之後，以HK$699/兩個(19吋+28吋) 賣比我，yeah!!!!! 開心到爆！！

所以話呢，女人買到平野，係感覺開心過中獎！！

時機

返嚟之後整咗的曲奇去探吓隔離個鄰居。
佢都有去旅行呀！
不過就係呢邊的人每年都去嘅 "七日陽光與海灘逃離厭悶的冬天" 之旅。

同佢傾開，我地兩個就喺到比較邊個嘅旅程黑仔的。
我嗰篇很長氣的，第日講。

而佢呢，好簡單，就係一出發就係機場仆街。
因為係老人家，係咁以比個喼 kick 到，就跌到左邊面腫晒，仲有手手腳腳好多擦傷損傷。不過好在無骨節，所以腫到豬頭咁樣佢都照去可也，佢話横掂係坐係到休息，梗係去陽光與海灘嘅嗰到坐係露台休養好過係呢到啦。。。

探完佢第二日，佢買咗盆花比我。

收到嗰時得一朵花開咗，因為要擺佢係唯一一個朝早有陽光直射嘅窗口位，有一朝埋去淋水，發現點解咁香嘅？先留意到第二朵開咗。

到今朝起身，特登拎出嚟比肥鬼睇吓我那朵剛開嘅花(右邊) ，嗰時係4am 最上面呢朵未開架，跟住去咗做家務，煮早餐，睇書，到8am 再行過發現呢朵都開咗。

8am

呢張係10點幾

同日下午

同日夜晚

呢棵花仲有一朵未開(係大後方) ，依家我好努力日日"吸"住佢，不過都要睇吓時機嘅，好似上面呢朵咁樣，係你面前都miss 咗佢開嗰刻，只可以話係無緣囉！

一生中會遇上幾多人

大約係2013年 ，網上流傳著一條短片，內容係講兩個人揾到伴侶的機會率有幾多。

The Proof that we are Soulmates

呢個 video 係一個男仔整嚟求婚用的。
入面用簡單的圖象，解釋兩個人係地球上相遇->相識->相愛的機會率。

我的那個 soulmate 已經揾到了，今次想講嘅其實係你一生中大約會有幾多朋友。

下面呢篇，係更加詳細咁用文字及數字講解呢條數點計出嚟嘅：(唔想睇片就可以去睇吓)
你知道我和你相愛的機會率是幾多嗎？
你知道我和你相愛的機會率是多少嗎？

做乜突然間講的咁玄妙嘅野？？？

(每次返嚟都做吓遊客，呢到就嚟唔洗5分鐘可以游到過去囉！)

因為剛返咗去香港一轉，發現對上一次返已經係2016年的事了，又突然間想起，自己原來嚟咗呢邊足足10年有多。

究竟10年之後，人生仲會有幾多朋友淨低？
我講嗰的，唔係面書嗰的'朋友'，而係真真正正可以約出嚟傾計，互相關心吓大家的家人和生活，係傾幾個鐘都講唔完的那種。

跟據上面條短片，以現在世界人口70億計，原來要識到知心朋友嘅機會率係0.000000003 即係10億份之3 (下面有解釋)

很感恩，今次返去，仲有很多朋友努力約出嚟見面。今次返嚟一個月，可以見到中學時期幾個八婆，大學時期的師奶朋友，合唱團嘅阿太，一大班童軍(變晒拖男帶女的), 仲有好多堆舊同事。

我上面講話係死黨朋友，真係無講錯架。
係呢個世界，仲邊有人會識得打嚟屋企電話揾人？
有日約咗朋友 lunch ，佢見我無藍√ 佢的whatsapp 佢識得10點幾打嚟屋企電話刮我(仲有我屋企電話號碼嗰吓真係勁！) ，因為知我未瞓醒，哈哈哈哈，嗰刻真心覺得呢的真係老朋友。

今次返嚟，有兩件事特別令我覺得人與人之間嘅緣份係好神奇嘅。

其中一位合唱團嘅阿太，是一位時髦的老婆婆，要用 email 同佢聯絡嘅，就係你等我覆，我等你答嘅同時，我係屋企附近街上撞到佢！！！

另外一位合唱團朋友，同佢食完最後一次 lunch 道別了，以為下次返嚟先可以再見的。就在最後一個星期日，我同童軍們去郊遊時撞上了。係沙頭角呀！我咁大個人未去過沙頭角，嗰日係的童軍嚟兜埋我，問吓究竟今日去邊架？先知去緊沙頭角。就係燒烤時見到合唱團的朋友一家大細行入嚟，真係立即彈起身衝埋去，哈哈哈。

你話呢個世界，話大唔大話細唔細，都可以咁樣撞到朋友，很幸運，撞到嘅全部都係好朋友 (如果係仇家就兜路走咗喇！)

今次返去，機票係早早買咗嘅，但係因為其他事故，所有約會都係返嚟先算嘅態度 (以前係會響晒朵，返嚟前就已經full booking 咁樣) 仲要今次一返到嚟就病咗一星期，以為會見唔到好多人，點知，要見的都見到了。很安心。

≡≡≡≡≡≡

認識知心朋友機會率：
現時世界人口70億
假設壽命80歲
假設80年可以認識到約3000人
兩人相識機會率：
3000 ÷ 7,000,000,000 = 0.0000004 即千萬份之4
上面呢個只係講認識普通朋友嘅機會率
假約一生會識到20個知心朋友：
20 ÷ 7,000,000,000 = 0.000000003
即10億份之3